Situata politike në Kosovë ka shqetësuar edhe parlamentin europian ku katër deputetë të saj i kanë shkruar një letër Presidentit Thaçi që të marrë masat për zgjidhje të situatës.
Katë Eurodeputetët Thomas Ëaitz, Reinhard Bütikofer, Viola von Cramon-Taubadel dhe Romeo Franz, i bëjnë thirrje presidentit Thaçi që të sigurojë “një qeveri funksionale në këtë kohë krize që reflekton rezultatet e zgjedhjeve të fundit”
Në këtë letër theksohen shqetësimet e kësaj partie për gjendjen politike nëpër të cilën po kalon Kosova.
Në letër ndër të tjera komentohet edhe situata pandemike në Kosovë ku i jepet mbështetje qeverisë në detyrë Kurti për masat e ndërmarra për të parandaluar përhapjen e koronavirusit në vend.
Letra e plotë
I dashur Presidenti Thaçi,
“Jemi thellësisht të shqetësuar për zhvillimet aktuale politike në Kosovë dhe dëshirojmë të adresojmë shqetësimet tona në këtë letër të hapur. Ne të Gjelbrit gjithmonë e kemi mbështetur rrugën e Kosovës drejt pavarësisë dhe demokratizimit dhe nuk mund të heshtim gjatë krizës aktuale. Vota e mosbesimit ndaj Qeverisë së kryeministrit Albin Kurti është një hap prapa për stabilitetin politik në Ballkanin Perëndimor në një kohë kur kohezioni është i nevojshëm urgjentisht. Pretendimet e fundit në lidhje me ndryshimet e mundshme kushtetuese përmes 82 deputetëve të Parlamentit janë një arsye më shumë e shqetësimit tonë.
Ne ju bëjmë thirrje që të siguroni një qeveri funksionale në këtë kohë krize që reflekton rezultatet e zgjedhjeve të fundit. Në pandeminë aktuale mbarëbotërore, një vend pa qeveri funksionale dhe praktikisht në krizë kushtetuese do të rrezikonte shëndetin dhe mirëqenien e gjithë popullatës së tij. Qeveria kosovare deri më tani trajtoi krizën në mënyrë të efektshme dhe madje ia doli të ndërmarrë hapa të rëndësishëm për të shfuqizuar tarifat. Qeveria e Albin Kurtit barti shpresat e brezit të ri të Kosovës për përparimin politik dhe shkarkimi i kësaj qeverie qartë bie në kundërshtim me vullnetin demokratik të popullatës së Kosovës.
Për periudhën e pas pandemisë, qëndrimi ynë është që zgjedhjet e reja të mbahen sipas Kushtetutës së Kosovës, meqë fundi i qeverisë së Albin Kurtit është jo si rezultat i një dorëheqjeje, por si pasojë e votimit të mosbesimit. Ne besojmë se ju, si President, duhet të respektoni parimin e balancimit të pushtetit dhe të siguroheni që të respektohen maksimat demokratike dhe sundimi i ligjit.
Marrëveshja e mbështetur nga SHBA-ja për Serbinë dhe Kosovën, të edhe e favorizoni, është thellësisht shqetësuese. Çfarëdo marrëveshje që përfshin një zhvendosje të kufijve në baza etnike mund të rezultojë në destabilizim të rrezikshëm. Modifikimet e kufirit dhe shkëmbimet e tokës bazuar në kriteret etnike në të kaluarën kanë çuar në luftëra, në vuajtje të mëdha dhe zhvendosje të njerëzve në Ballkan. Kosova është një vend multi-etnik, dhe ne kundërshtojmë me forcë çdo përpjekje që tenton të kthehet në politikën e viteve të 1990-ta.
Ne të Gjelbrit vazhdojmë të avokojmë për demokraci dhe sundim të ligjit në Kosovë, dhe për përfshirjen e saj të vazhdueshme në masat mbështetëse të BE-së gjatë pandemisë globale. Kjo betejë ka të bëjë me stabilitetin, shëndetin publik dhe paqen në Kosovë, një betejë që nuk mund të fitohet pa e respektuar demokracinë.
Sinqerisht tuajit,
Thomas Ëaitz, anëtar i Parlamentit Evropian dhe bashkëkryetar i Partisë së Gjelbër Evropiane
Reinhard Bütikofer, Anëtar i Parlamentit Evropian
Viola von Cramon-Taubadel, Anëtare e Parlamentit Evropian
Romeo Franz, Anëtar i Parlamentit Evropian”.
Discussion about this post