Spitalet e Kukësit dhe Burrelit nuk kanë në stafin e tyre gjinekologë. Nga kjo situatë shumë gra shtatzëna nga këto zona verilindore i drejtohen kryeqytetit për lindje. Në qytetin e Kukësit flasin për rënie të lindshmërisë, ndërsa në maternitetin e Burrelit nuk u regjistrua asnjë lindje në këtë fillim vit.
“Ora News” shkruan se spitali i Kukësit vijon të vuajë mungesën e mjekëve specialistë edhe pse i shërben një komuniteti të gjërë banorësh në verilindje të vendit. Problematike mbetet veçanërisht mungesa e gjinekologëve dhe reanimatorëve, dukë bërë që shumë gra shtatzëna t’i drejtohen spitaleve të kryeqytetit për të lindur.
Sipas statistikave për 2017, në Kukës u regjistruan 684 lindje, që tregon ulje të lindshmërisë në krahasim me vitet e shkuara, por e lartë e krahasuar për numër banorësh me zonat e tjera të vendit.
Mungesën e mjekëve specialistë e vuan edhe materniteti i Spitalit “Xhavit Mara” në Burrel.Në vitin 2017, pranë Maternitetit të Burrelit u regjistruan vetem 13 lindje normale. (J.V/Faxweb)
