Deklarata nga më tronditëset dëgjojmë nga të punuarit në një kompani call center-i. Ndërsa pak ditë më parë punonjësit e një kompanie call centeri shkruan në murin e vendit të tyre të punës një parullë, duke e cilësuar këtë vend si “Qendër shfrytëzimi”, një tjetër demostrim shokues bëhet publik. Këtë radhë bëhet fjalë për një video nga ambientet e punës në një kompani call centeri. Videoja është publikuar nga portal “JOQ”.
“Unë jam një ish-punonjës (operator) në një Call Center në Tirane (IDS) dhe po ju dërgoj një video që paraqet diskriminimin, presionin, abuzimin psikologjik që ndodh në këtë call center. Dua që ta publikoni këtë material ju lutem, që ta shohin të tjerët se çfarë presioni dhe dhune psikologjike ndodh në këtë kompani”, shkruan punonjësi krahas videos së dërguar te ky portal.
Në videon në fjalë, supervizorja ulëret me sa ka në kokë duke iu përmendur punonjësve orët e punës dhe bonuset si kërcënim, në mënyrë që ata të bëjnë sa më shumë kontrata.
“Kemi ardhur këtu për të bërë lekë, për të justifikuar rrogën, siguracionin, çdo gjë që na paguhet. Nuk po kërkoj që secili nga ju të bëj nga dy kontrata në ditë, apo të bëni kontrata. Ju kam kërkuar të bëni kontrata apo ju kam kërkuar të zgjatni telefonatat? Ça po bëni? Apo doni t’ju themi bëni kontrata dhe ndryshe jeni të pushuar? Disa prej jush kanë një vit që punojnë këtu. Po ju japim bonuse. Futjuni punës! Kaq po ju them”, janë fjalët e saj. (D.D/Shuplaka)
Discussion about this post