Një shqiptar i shpallur në kërkim ka arritur t’u shpëtojë forcave të policisë. I identifikuar si Armando Nikolin Ndreu 27 vjeç, nga Shkodra, ai ka mundur të largohet menjëherë pasi ka zbritur në portin e Durrësit.
Ishin autoritetet e sigurisë në Itali që e kishin kthyer shqiptarin pasi ishte ndaluar në Bari, duke mos e lejuar të vazhdonte hyrjen në shtetin italian. Por ai zyrtarisht nuk rezulton të ketë zbritur me tragetin që ka mbërritur këtë mëngjes në port.
I shpallur në kërkim për “Vjedhje me dhunë” dhe “Kundërshtim i policisë”, i riu dyshohet të ketë zbritur nga trageti pa u pikasur e më pas të jetë larguar. Në arratisjen e tij dyshohet të jetë ndihmuar nga një bashkëpunëtor.
Pritet që për largimin e 27-vjeçarit drejt Italisë, të merren masa ndaj oficerëve të cilët kanë bërë kontrollin e kanë firmosur pasaportën e tij. Deri tani policia nuk ka dhënë zyrtarisht asnjë version mbi ngjarjen.
(XH.A/SHUPLAKA)
