Futbolli europian sapo është tronditur.
Bëhet fjalë për futbollistë të natyralizuar si italianë që kanë përfituar dokumentat nëpërmjet falsifikimit.
Sipas “Corriere della Sera”, policia në Napoli ka zbuluar se 300 futbollistë brazilianë, një pjesë e të cilëve që aktivizohen në nivelet më të larta të kampionateve në Itali, Francë dhe Portugali, kanë fituar në mënyrë jo të ligjshme nënshtetësinë italiane.
Sipas “Corriere della Sera”, policia me kërkesë të Prokurorisë ka vënë në pranga shefin e Gjendjes Civile të një prej komunave të provincës së Napolit, si dhe drejtuesin e një agjencie për praktikat administrative.
Dy të arrestuarit akuzohen për korrupsion, falsifikim dokumentesh dhe favorizim të emigracionit klandestin.
Mes futbollistëve që kanë përfituar dokumente false të nënshtetësisë italiane figurojnë lojtarë që janë pjesë e skuadrave jo pak të njohura si Palermo, Monaco, Atletico Mineiro, apo edhe skuadra të tjera të kampionateve të futbollit, raporton fantagazzetta.com.
Kjo vjen pas skandaleve jo të pakta me ndeshjet e shitura dhe korrupsionin në instancat e larta drejtuese tё futbollit.(M.D/ Shuplaka)
