Nuk kanë fund skandalet me tenderat publikë. Pas skandalit me tenderat e Drejtorisë së Burgjeve, rast i zbuluar në korrik 2016, sërish, të njëjta kompani vazhdojnë të përfitojnë nga taksat e qytetarëve shqiptarë.
Pas furnizimeve me dru, lëndë djegëse, xhama shkollash, ushqime katering, transport mësuesish dhe pas ndjekjes dhe procedimit penal të administratorit për tendera fiktivë me Drejtorinë e Përgjithshme të Burgjeve, kompania “M.B.Kurti SH.P.K” vazhdon me sukseset e saj në fitimin e tenderave të tjerë publikë.
Ujësjellësi i Tiranës e ka kontraktuar për Shërbim UPS për server dhe printer-fotokopje.
Sipas Aranita Brahaj, e njëjta kompani ka fituar së fundmi edhe tender për korrëse bari e motosharra per Agjensinë e Parqeve dhe Rekreacionit në Bashkinë e Tiranës, ku vlera e tenderit shkon mbi 7 milionë lekë të rinj, dhe mjaft shtesa kontratash me plus 20% me Bashki të tjera, kryesisht të drejtuara nga e majta.
Edhe pse administratori i saj është ndjekur dhe proceduar penalisht, Prokuroria e ka lënë të punojë dhe nuk ka marrë ndonjë masë për pezullim të të drejtës për pjesëmarrje në tendera.
Sipas asaj që mund të gjendet shumë lehtë në web-in e prokurimeve publike, kompania në fjalë ka fituar 32 tendera në disa bashki të vendit, duke nisur nga Tirana, Saranda, Lushnja etj.
Lexoni listën http://www.prokurimetransparente.al/sq/tender/list/corporate_id/J64103483H
Shuplaka.com bëri edhe një kërkim në QKB, ku rezulton se kompania “M.B Kurti Sh.p.k” ka për administrator Shemsi Sinanin, një prej të ndaluarve në korrik 2016 për abuzime me tenderat e Drejtorisë së Përgjithshme të Burgjeve.
“Prokuroria për Krime të Rënda kërkoi caktimin e masës së sigurisë “arrest në burg”, gjë e cila u pranua nga ana e Gjykatës për Krime të Rënda, për shtetasit, si më poshtë:
1.Iljaz Labi, me detyrë zv.Drejtor i Përgjithshëm i Burgjeve
2.Elidjan Laskaj, administrator i shoqërisë “Dogel”
3.Ylber Kalaja, administrator i shoqërisë “Vllaznia”
4.Shemsi Sinani, administrator i shoqërisë “M.B.Kurti”
5.Nexhmi Balla, administrator i shoqërisë “Nelsa”
Vendimet e Gjykatës për Krime të Rënda janë ekzekutuar pasditen e së hënës (dt.11.07.2016) nga ana e forcave të Policisë së Shtetit”, thuhet në njoftimin e organit të akuzës për rastin në fjalë.
