Gjelina Baca ka vetëm arsimin e mesëm, por ajo mbante detyrë të rëndësishme në Bashkinë e Lezhës. Baca ishte drejtoreshë e Drejtorisë së Bujqësisë.
Burime nga Fax News bëjnë me dije se Gjelina Baca ka tentuar të zhdukë dy dosje pronash kur ka mësuar se do të ndalohej nga policia. 58-vjeçarja mbante detyrën e drejtoreshës së Bujqësisë në Bashkinë e Lezhës.
Baca i ka telefonuar nuses së djalit, duke i thënë që të fshihte dosjet që kishte në shtëpi, të cilat në fakt u gjetën dhe u sekuestruan nga Policia. Përveç Gjelina Bacës, Gjykata ka vendosur “arrest shtëpie” edhe për Juxhina Memën, 25 vjeçe, ish – specialiste në Drejtorinë e Bujqësisë në Bashkinë Lezhë, Marte Gjergji, 50 vjeçe, me detyrë topografe, Frrok Frroku, 75 vjeç, babai i biznesmenit në kërkim, me banim në Bashkinë Mamurras, i cili ka përfituar tokë në mënyrë të paligjshme, si dhe Luigj Paloka, 76 vjeç, me banim në Shkodër, i cili dyshohet se ka falsifikuar aktet.
Gjithashtu, janë shpallur në kërkim dhe punohet për kapjen e 11 shtetasve, me detyra në ZVRPP, në ish-Komunën Shëngjin apo përfitues tokash në mënyrë të paligjshme. Hetimet lidhur me këtë dosje kanë filluar mbi bazën e të dhënave të siguruara nga burime policore dhe ankime të qytetarëve.
