Tiparet e statujës së Skënderbeut në Hungari kanë sjellë edhe reagimet e fundit. Ambasadori shqiptar ne Hungari, Arian Spasse është shprehur se kjo statujë në këtë formë është një makat.
“Duke marrë shkas nga disa reagime të miqve në FB lidhur me fizionominë e bustit të Skënderbeut që planifikohet të vendoset në Budapest, dëshiroj të sqaroj se maketi i paraqitur në foto është vetëm maket. Ai do të pësojë ndryshime deri sa të marrë tiparet me të cilat shqiptarët janë familjarizuar. Faleminderit për mirëkuptimin”, shkruan ambasadori Arian Spasse.
Ky reagim ka ardhur pasi në faqen e Ambasadës Shqiptare në Hungari në Facebook janë shfaqur dy fotografi që paraqisnin shtatoren e Skënderbeut që do të vendoset në Budapest. Por ajo që lë për të dëshuruar janë tiparet e Skënderbeut të cilat nuk ngjajnë me figurën e Heroit tonë Kombëtar. Madje duket edhe si një tjetër person nëse fokusohemi te tiparet.
Po kështu janë hequr edhe dy fotografitë e mëparshme nga faqja në Facebook e ambasadës.
Sjellim në vëmendje që reagimi më i ashpër ndaj kësaj vepre erdhi nga Dekani i Fakultetit të Arteve Pamore, Ardian Isufi, i cili e quajti një “mynxyrë artistike”, skulpturën hungareze.
Ai theksoi se ishte “injoranca” e institucioneve shqiptare, që pranojnë një “denigrim’ të tillë të figurës së Heroit tonë Kombëtar.
Në një intervistë për “Panoramën”, Isufi u shpreh se “në Arkivin e Vatikanit ka dhjetëra gravura, në të cilat shquhen disa tipare karakteristike të fizionomisë së Skënderbeut, si hunda si shkabë, vetullat me kënd. Elementë, mbi të cilët është mbështetur edhe Odhise Paskali, edhe pse ai e ka interpretuar figurën artistikisht”. (J.V/Shuplaka)
