Deputeti Lefter Maliqi i cili prej vetëm pak javësh është deputet i Kuvendit të Shqipërisë, i mandatuar pas largimit në grup të deputetëve të opozitës ka bërë thirrje për shpërndarjen e Parlamentit.
“Parlamenti duhet të shpërndahet. Vendi të kalojë në zgjedhje të parakohshme. Përgjimi i shitblerjeve të votave, ndërhyrja e grupeve kriminale tregon se deputetët, drejtorët, kryetarët e Bashkive etj zgjidhen, vendosen dhe emërohen nga krimi“, shkruan Maliqi në statusin e tij në FB.
Ai gjithashtu u ka bërë thirrje shqiptarëve të protestojnë fuqishëm dhe të marrin në dorë fatet e tyre.
“E ardhmja e vendit është në rrezik, jemi të pasigurt nën kthetrat e krimit. Shqiptarët të marrin në dorë o sot o kurrë fatet e vendit. Protesto fuqishëm kunder krimit të organizuar mos u ndal për drejtësi, per votën e lire, për të ardhmen e sigurt.” përfundon Maliqi.
Ky i fundit gjithashtu prej ditësh apelon për zgjidhjen e krizës politike në vend, ndërsa ngulmon për shtyrjen e zgjedhjeve të 30 qershorit, datë e cila mund të kthehet në tragjedi kombëtare për shkak të përplasjes civile.
Discussion about this post