Prej disa ditësh rrethinat e qytetit të Shkodrës po vuajnë pasojat e përmbytjeve për shkak të shkarkimit të hidrocentraleve.
Dhe sikur të mos mjaftonte kjo në kufijtë e skandalit është ajo që ka ndodhur me makinat ku transportohej uji i pijshëm.
E njëjta makinë e cila shihet në fotot e Bashkisë Shkodër duke transportuar ujin e pijshëm për banorët e zonave të përmbytura, sipas Ujësjellës Kanalizimeve përdoret për zhbllokimin e ujërave të zeza në muajin nëntor që lamë pas.
Kanë qenë një pjesë e shoqërisë civile në Shkodë ata që kanë ngritur alarmin, duke shtruar dhe pyetjet për kryetaren e Bashkisë Voltana Ademi. Qytetarët i druhen përhapjes së ndonjë sëmundjeje epidemike, duke qenë se është e njëjta cisternë që përdoret për të dyja rastet.
“Znj.Voltana Ademi, nji pyetje teknike dhe jetike ne fakt! Kjo makine me targe Sh.5350C, qe keni perdorur per zhbllokimin e ujnave te zeza pak dite ma pare dhe gjithashtu qe keni perdorur per rastin e fundit per furnizimin e ujit te pijshem per te permbytunit, a asht normale? A rrezikohet ndaj epidemi kur perdorni te njejten cisterne per ujnat e zeza dhe per ujin e pijshem?”, shkruan një anëtarët e shoqërisë civile.
Komentet kanë qenë të shumta në lidhje me këtë shqetësim, ndërsa ‘’Faxweb.al” do të kërkojë gjatë ditës së nesërme një reagim zyrtar nga ana e institucioneve në Shkodër.
(E.K/FAXWEB)
