Skandali te Onkologjiku, Apeli i GJKKO nuk ndryshon masën e sigurisë për mjekun Gashi/ Ja vendimet

Apeli i GJKKO ka lënë në fuqi masën e sigurisë “arrest shtëpie” për mjekun Edmond Gashi, ndërsa ka zbutur masën e sigurisë nga arrest shtëpie në detyrim paraqitjeje për farmacistin, Florian Marku.

Ndërkohë Halil Gashi dhe Brikena qirjazi që ishin me masat “detyrim paraqitjeje”, Apeli vendosi t’i çlirojë nga masat e sigurisë

Në Apelin e GJKKO Gashi dhe të tjerët kërkuan zëvendësimin e masave përkatëse të sigurisë, me më të buta. Kështu, Edmond Gashi bëhet me dije se ka kërkuar që t’i hiqet masa e arrestit shtëpiak.

Të gjithë personat po hetohen nga SPAK lidhur me atë që u konsiderua si skandali i Onkologjikut, që u pasua me denoncime të shumta, jo vetëm sa i takon mungesës së barnave mjekësore për personat që vuajnë nga tumoret, por edhe me zvarritjet dhe trajtimet mjekësore të pacientëve.

Hetimi në SPAK është regjistruar për “korrupsion”, “shpërdorim detyre” dhe “kontrabandë e ilaçeve”.

Masat e Sigurisë të caktuara nga Apeli i GJKKO

Edmond Gashi, mjek pranë Spitalit Onkologjik në QSUNT i akuzuar për veprën penale të “Shpërdorimit të detyrës”, “Arrest shtëpie”

Emiljano Lela, koordinator pranë Spitalit Onkologjik në QSUNT, i akuzuar për veprën penale të “Shpërdorimit të detyrës”, “Detyrim Paraqitje”.

Alketa Ymeri(Pere), mjeke pranë Spitalit Onkologjik në QSUNT, e akuzuar për veprën penale të “Shpërdorimit të detyrës”, “Detyrim Paraqitje”.

Brikena Qirjazi, zv/Drejtoreshë në QSUNT e ngarkuar me detyra për shërbimin onkologjik e akuzuar për veprën penale të “Shpërdorimit të detyrës”, nuk ka masë, hetohet pa masë sigurie.

Halil Gashi, i akuzuar për veprën penale të “Fshehjes së të ardhurave” pa masë, hetohet pa masë sigurie.

Florian Marku i akuzuar për veprën penale të “Tregtimi dhe transportimi i mallrave që janë kontrabandë” dhe “Ruajtja ose depozitimi i mallrave që janë kontrabandë”, masë detyrim paraqitjeje.

Për Drilona Kishta për të cilën ishte vendosur masa e sigurisë “Detyrim Paraqitje” e akuzuar për veprën penale “Shpërdorim Detyre” nuk është bërë ekzekutimi i vendimit penal pasi ajo ishte jashtë shtetit dhe është vendosur njoftim në kufi.

Njoftimi nga GJKKO

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më 18.09.2024, shpalli vendimin mbi çështjen penale nr. 39 akti, datë 09.09.2024 regjistrimi, mbi ankimin e personave nën hetim E.G., B.Q., F.M., H.G., me objekt: “Ankim ndaj vendimit nr. 84, datë 24.07.2024, të Gjykatës së Posaçme të Shkallës së Parë për Korrupsionin dhe Krimin e Organizuar”, disponuar në lëndë të masave të sigurimit personal, dhe vendosi:

1. Miratimin e Vendimit nr. 84, datë 24.07.2024 të Gjykatës së Posaçme të Shkallës së Parë për Korrupsionin e Krimin e Organizuar për sa i përket disponimeve kundrejt Z. E.G.

2. Ndryshimin e Vendimit nr. 84, datë 24.07.2024 të Gjykatës së Posaçme të Shkallës së Parë për Korrupsionin e Krimin e Organizuar për sa i përket disponimeve kundrejt Z. F.M.

3. Caktimin ndaj Z. F.M. të masës së sigurimit “Detyrim për t’u paraqitur në policinë gjyqësore”, të parashikuar nga neni 234 të Kodit të Procedurës Penale, duke e urdhëruar atë të paraqitet pranë oficerit të policisë gjyqësore, që është i ngarkuar me hetimin, çdo të ditë të mërkurë, në orën 09:00.

4. Shfuqizimin e Vendimit nr. 84, datë 24.07.2024 të Gjykatës së Posaçme të Shkallës së Parë për Korrupsionin e Krimin e Organizuar për sa i përket disponimeve kundrejt Z. H.G.

5. Rrëzimin e kërkesës së Prokurorisë së Posaçme kundër Korrupsionit dhe Krimit të Organizuar për caktimin e masës së sigurimit personal ndaj personit nën hetim Z. H.G.

6. Ndryshimin e Vendimit nr. 84, datë 24.07.2024 të Gjykatës së Posaçme të Shkallës së Parë për Korrupsionin e Krimin e Organizuar për sa i përket disponimeve kundrejt Znj. B.Q.

7. Rrëzimin e kërkesës së Prokurorisë së Posaçme kundër Korrupsionit dhe Krimit të Organizuar për caktimin e masës së sigurimit personal ndaj personit nën hetim Znj. B.Q.

8. Ngritjen në Kolegjin Penal të Gjykatës së Lartë të parashtrimit mbi mungesën e kompetencës lëndore të gjykatës së posaçme për sa i përket pjesës së procedimit penal me objekt faktin penal historik të administrimit të burimit të “Kobaltit”, me persona nën hetim Znj. B.Q. dhe Znj. D.K.

9. Urdhërohet sekretaria gjyqësore që të paraqesë në Gjykatën e Lartë kopjen e akteve për zgjidhjen e mosmarrëveshjes së kompetencës lëndore në këtë procedim penal.
10. Kundër disponimeve të këtij vendimi mbi masat e sigurimit personal mund të bëhet rekurs në Gjykatën e Lartë brenda 45 ditëve, duke nisur ky afat nga e nesërmja e njoftimit të vendimit të arsyetuar.

11. Kundër disponimit mbi parashtrimin e mosmarrëveshjes mbi kompetencën lëndore në Gjykatën e Lartë nuk mund të ushtrohet ankim.