Emisioni “STOP” në TV Klan është ndalur puntatën e sotme në disa produkte ushqimore, kryesisht kikirikë që vijnë nga Kina, që në përbërje të tyre kanë sasi të lartë aflatoksine, një lëndë e dëmshme për shëndetin.
Ndalesa që është bërë në tre dyqane të tregut Agro Ushqimor, tregohet se ky produkt ka një konsum të lartë, sidomos në prag festash të fundvitit.
Specialistja e Institutit të Shëndetit Publik, Lindita Molla shpjegon, se çfarë ndodh me shëndetin në rast të konsumit të ushqimeve me aflatoksinë.
“Aflatoksina është një përbërës kimik me efekte toksike. Nivelet e lejuara janë të ndryshme sipas gjetjes së saj në produktet e ndryshme, por edhe sipas natyrës së aflatoksinës. Zakonisht limitet duhen respektuar. Nëse këto vlera të gjetjes nëpërmjet metodave të ndryshme analitike janë mbi vlerat maksimale të lejuara kanë efekte negative për shëndetin. Efektet e tyre sipas produktit janë të dëmshme në organet e ndryshme. Efektet që japin shkaktojnë sëmundje me natyrë kronike. Ato janë të padukshme, zgjasin në kohë dhe prognoza nuk është gjithmonë pozitive. Ato shkaktojnë sëmundje kancerogjene. Mund të jetë kanceri i Heparit ose cirroza hepatike, që mund të vijnë nga konsumi i një qumështi të kontaminuar me aflatoksinë B1, mund të vijë nga kikirikët ose frutat e thata, të cilat edhe ato kanë një tip tjetër aflatoksine, por duhet marrë në konsideratë që sa më pak produkte ushqimore të kontaminuara me aflatoksinë, më pak efekte kemi”, është shprehur Molla.
Pak ditë më parë Kroacia vendosi tërheqjen nga tregu të kikirikëve që vinin nga Kina. Kjo pasi analizat treguan një sasi më të madhe se norma e aflatoksinës, një lëndë kjo kancerogjene. Përveç ndalimit në treg, mediat kroate bënë me dije se kanë njoftuar zyrtarisht të gjitha strukturat e BE-së, që merren me çështjen e sigurisë ushqimore.
Edhe mediat italiane shkruajnë për një “listë të zezë” të produkteve të kontaminuara me aflatoksinë.
Discussion about this post