Nazim Thaçi, vëllai i Presidentit të Kosovës Hashim Thaçi, kapet me armë në brez dhe nën ndikim të alkoolit gjatë një kontrolli policor.
Kur është ndaluar nga policia e trafikut, Thaçi nuk ka patur as patentë shoferi e as leje për armë.
Pavarësisht kësaj ai nuk e ka pranuar gabimin por i ka dalë kundër policisë duke thënë: “Nuk e dini kush jam unë?!”.
Në momentin kur është ndalur, Nazim Thaçi ka treguar se ka një armë në brez të tipit HS kalibri 9x19mm. Të paktën kështu thuhet në një raport të publikuar nga gazeta “ekspress”.
Pas këtij rrëfimi, mësohet se Thaçi ka shtuar: “Nuk e dini kush jam unë, se me ditë se kush jam unë, nuk më kishit ndalë fare”.
Në momentin kur është ndaluar nga policia, Thaçi nuk ka pasur as patentë shoferi. Polici në detyrë, që nuk mori asnjë dokument të identitetit të tij, e shoqëroi atë në automjetin zyrtar në stacion, e kështu më pas e lejoi edhe të bëjë thirrje telefonike, që t’i silleshin edhe dokumentet e lejes së armës, të cilat Nazimi tha se i posedonte.
Gjatë rrugës për në stacion policor, mësohet se Nazimi kishte kërcënuar policinë me fjalët: “Unë jam vëllau i Hashim Thaçit dhe nesër në mëngjes kam me shku në zyre të Shpend Maxhunit dhe kam me e njoftu që të marrë masa ndaj jush për arsye se ju e keni ndalë vëllain e Presidentit pa arsye”.
Sipas dokumentit në fjalë, Nazimi ka pranuar se kishte konsumuar alkool, kur u pyet nga patrulla e policisë për një gjë të tillë. Dokumenti thotë se pas 30 minutave, djali i Nazimit i ka sjellë letërnjoftimin, patentën e shoferit dhe lejen e armës.
Nazim Thaçi u ndalua nga policia rreth orës 01:00 më datë 11.11.2016, te rrethi në dalje të Prishtinës.
Automjeti me të cilin Nazimi udhëtonte nuk ishte i tij, por nën pronësi të dikujt tjetër.
