S’kanë të sosur problemet për deputetin Tom Doshi. Ai është thërritur sërish sot në Prokurori nën akuzën për deklarim të rremë të pasurisë.
Atij i është dashur që të ndërpresë fushatën në Qarkun e Shkodrës dhe të paraqitet sërish në organet e hetimit.
Dosja e tij pritet të dërgohet për shqyrtim në Gjykatën e Lartë. Doshi është kandidat për deputetë në Qarkun e Shkodrës nën siglën e Partisë Social Demokrate.
Hetimet për deputetin e Shkodrës mësohet se kanë nisur dy vite më parë, pas një kallëzimi të ILDKPI, por që prokuroria e ka përmbledhur me akuzën e përmendur më sipër.
Po ashtu mësohet se pas këtij vendimi Doshi do ti drejtohet Gjykatës së Lartë.
Ja çfarë thoshte ILDKPI dy vite më parë për Doshin
Kujtojmë se ILDKPI ka dorëzuar në Prokurorinë e Përgjithshme kallëzimin penal për deputetin Tom Doshi, i cili akuzohet për fshehje dhe deklarim të rremë të pasurisë. Bëhet fjalë për një shumë, që sipas Inspektoratit të Lartë të Deklarimit dhe Kontrollit të Pasurisë, shkon deri në 23 milionë euro. Shkeljet, sipas ILDKP-së, janë kryer nga viti 2005 deri në vitin 2014.
ILDKPKI ka dërguar kallëzimin penal në Prokurorinë e Përgjithshme për veprat penale të parashikuara duke insistuar që hetimet të shtrihen më tej për të parë nëse ka ndonjë shkelje tjetër. Inspektorati i Lartë i Deklarimit dhe Kontrollit të Pasurive dhe Konfliktit të Interesave, bazuar në ligjin nr. 9049, datë 10.4.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publike”, i ndryshuar, përfundoi kontrollin dhe rikontrollin e plotë të deklaratave të interesave private të subjektit Tom Doshi, me funksion Deputet i Kuvendit të Shqipërisë, për periudhën kohore 2005 – 2014, nga ku rezultuan fshehje të pasurive, deklarime të rreme, për pasuritë në shumën rreth 14.000.000 euro, kontrata fiktive pasurish, transferta bankare të dyshimta e pa burime të ligjshme financiare dhe dyshime për pastrim parash, brenda dhe jashtë vendit, në shumën rreth 9.000.000 euro. (E.K/SHUPLAKA)
Discussion about this post