I rikthyer bashkë me skuadrën e tij nga dy javë përgatitore në Antalya të Turqisë, ish-trajneri i Tiranës, Ilir Daja, duket se ndjehet gati të rinisë garën, kësaj here nëpërmjet një aventure të re, me një tjetër ekip, kampionët në fuqi, Skënderbeun.
I kënaqur nga minifaza e zhvilluar, Daja, në një intervistë të publikuar në faqen zyrtare të klubit korçar, ka folur për merkaton e zhvilluar dhe atë që pret ende deri në skadimin e afatit, sikurse dhe për largimet e mundshme, pa lënë mënjanë edhe objektivin kryesor në këtë gjysmë të dytë të kampionatit.
“Përgjithësisht jam i kënaqur dhe besoj se kemi bërë një fazë të mirë. Kemi punuar me program të detajuar për rritjen fizike dhe e rëndësishme është që ekipi nuk ka pasur dëmtime të mëdha. Bashkë me presidentin dhe drejtorin sportiv, kemi përzgjedhur disa lojtarë që do të vinin në provë dhe janë testuar mbi atë çka mund të jepnin në këtë ekip. Konkretizuam akordin me Predeskun, i cili është një lojtar që mund të na shërbejë në ndërtimin e lojës. Po ashtu, kemi vlerësuar edhe lojtarët e tjerë, kryesisht të rinj, që mund të ndihmojnë ekipin. Një prej tyre është sulmuesi Çarls. Sigurisht duam të bëjmë një goditje të mirë në sulm, pavarësisht se kemi kryesulmuesin tonë, Hamdi Salihin, por edhe Latifin, Xhejms e Plakun. Gjithsesi, asnjëherë nuk mund të quhet e mbyllur një merkato në një ekip si Skënderbeu, që ka ambicie dhe potencial të fitojë shumë. Merkatoja është e hapur deri më 31 janar dhe do të shohim se çfarë do të ndodhë”, është shprehur tekniku i korçarëve.
“Unë besoj te grupi i lojtarëve që kam. Skënderbeu ka një kontingjent të mirë dhe të aftë për të fituar titullin. Janë lojtarë që dinë të fitojnë dhe të mbajnë peshën e duhur në ekip. Në të gjitha ekipet ku unë kam punuar, nuk kam patur asnjëherë frikë nga kundërshtarët. Nuk e shoh të frikshëm Partizanin dhe asnjë ekip tjetër, pasi nëse Skënderbeu im di të përballojë mirë situatën ndeshje pas ndeshjeje, gjithçka është në rregull. Skënderbeu është një ekip shumë i kompletuar dhe nuk ka pse të druhet nga askush. Ky grup është i aftë të përsërisë sezonet e kaluara dhe të shpallet sërish kampion për herë të shtatë radhazi”, është shprehur Ilir Daja.
Superliga shqiptare ristarton fundjavën e ardhshme. (A.R/SHUPLAKA)
