Elbasani dje u mbulua nga festa e korçarëve dhe jo vetëm. Kualifikimi i skënderbeut në fazën e grupeve është një arritje e madhe për të gjithë futbollin shqiptar, e sidomos kur kjo vjen pas akuzave për trukime që kishin rënduar mbi klubin.
Kjo ishte hakmarrja e Skënderbeut pas humbjes së pësuar dy vite më parë nga Dinamo e Zagrebit. Korçarëve iu mjaftuan vetëm dy barazime dhe një gol në fushën kundërshtare për të plotësuar qëllimin e tyre, kualifikimin.
Kualifikim që shoqërohet dhe me një bonus të mirë financiar, tek e fundit ca financa më shumë në arkën e ekipit nuk janë keq. Duke ditur që pjesëmarrja në fazën e grupeve të kompeticionit europian kërkon energji të shtuara.
Ekipi Korçar në sajë të kualifikimit do të përfitojë 3.3 milionë euro nga UEFA ndrysa lojtarët do të marrin 200 mijë euro shpërblim. Pasi barazoi javën e parë 1-1 në “Maksimir”, edhe në shtëpi skuadra korçare barazon 0-0, dhe me gol në fushën kundërshtare kualifikohet në fazën e grupeve të Europa League.
Ndërkohë që në mesditën e sotme pritet të hidhet dhe shorti i grupeve për të mësuar më shumë rreth kundërshtarëve të Skendërbeut që do të jenë tre. Ndeshjet në grupe rezervojnë në total 6 takime, 3 që luhen në shtëpi dhe tre jashtë. Dy ekipet e para që renditen në grup kualifikohen për në fazën tjetër.
Ruajtja e barazimit ditën e djeshme ishte edhe më e vështirë pasi për disa minuta në pjesën e dytë skuadra korçare u detyrua të luante me një lojtarë më pak.
Ndeshja
Të besuarit e Ilir Dajës tregohen të rrezikshëm në minutën e 6-të me Liridon Latifin, duke drithëruar kroatët. Ylli i korçarëve synon me një gjuajtje të fortë nga jashtë zonës, por portieri i Dinamos devijon me vështirësi. Më pas vendësit vazhdojnë të luajnë mirë, duke mos u vënë në asnjë moment në rrezik nga kundërshtari. Me pjesën e parë të mbyllur 0-0 Skënderbeu e sheh veten në fazën e grupeve. Në pjesën e dytë në të 52’ Shehi shpëton korçarët, duke pritur gjuajtjen e Olmo. Për Skënderbeun, Soue ka rastin më të mirë të shënojë, por i vetëm përballë portierit kroat nuk gjuan si duhet. Në të 78’ çdo gjë ndërlikohet për bardhekuqtë, pasi mbeten me dhjetë lojtarë. Nimanga ndëshkohet me karton të kuq. Por me Shehin në krye bardhekuqtë tregohen heroik, duke mos pësuar gol dhe arrijnë për të dytën herë në grupe.
Festa
Pas përfundimit të ndeshjes, në stadiumin “Elbasan Arena” ka filluar festa e merituar e korçarëve, të cilët janë përshëndetur me të gjithë tifozët e pranishëm duke bërë xhiron e nderit në stadium. Ndërsa futbollistët shqiptarëve gëzoheshin, për ata të Dinamos së Zagrebit ka filluar “gjyqi’, nga tifozët e pranishëm kroatë të cilët kanë pasur kontestime të shumta ndaj lojtarëve.
(E.K/SHUPLAKA)
Discussion about this post