Presidenti i Skënderbeut, Ardian Takaj, i është kundërpërgjigjur presidentit të Kukësit, Safet Gjici, i cili kishte deklaruar se Skënderbeut i ishte hequr me të drejtë titulli kampion.
Në një prononcim për “Panorama Sport” ku ka komentuar disa nga çështjet e ditëve të fundit, Takaj ka thënë se Gjici po përzien politikën me sportin.
Ai thotë se Gjici duhet ta ndajë mendjen të merret me politikë ose me sport.
“Nuk e di pse Gjici është duke i ngatërruar gjërat dhe nuk po mban një qëndrim, kërkon të përziejë sportin me politikën, por janë dy gjëra shumë të ndryshme. Prandaj i them që të mbajë vetëm një drejtim: Ose të merret me sport, ose me politikë.
Gjici e di shumë mirë se kush është Skënderbeu. Nëse ka diçka për të thënë, la ta thotë hapur dhe ta marrim vesh të gjithë. Mendoj se ndoshta është ende në eufori nga fushata elektorale.
Bën mirë të mendojë për ekipin e tij dhe për ndeshjen që ka përpara, sepse është një ndeshje shumë e rëndësishme si për të edhe për futbollin shqiptar”, u përgjigj Takaj. (B.H/Shuplaka)
Discussion about this post