“Skifterat” nga Korça vjedhin pije energjike por kapen mat, policia nis procedimin penal

Deri më tani jemi mësuar të dëgjojmë për vjedhje bizhush, parash, madje edhe bagëtish, por kurrë për pije energjike.

Mirëpo katër të rinj nga Korça i thyejnë të gjitha pritshmëritë duke vjedhur 11 koli me pije energjike në shtëpinë e një personi tjetër, në lagjen numër 10.

Arrestimi i të rinjve me inicialet K.S, K.T, M.K, F.K, u bë vetëm një ditë më parë, ndërsa ndaj tyre ka nisur procedimi penal në gjendje të lirë.

“Specialistët e Seksionit për Krimet në Komisariatin e Policisë Korçë, filluan procedimin penal në gjendje të lirë ndaj katër shtetasve të mëposhtëm:

K.S, 22 vjeç; K.T, 22 vjeç; M.K, 16 vjeç; F.K, 14 vjeç, banues në Korçë.

Procedimi ndaj tyre filloi pasi më datë 20.05.2017, këta shtetas në bashkëpunim mes tyre, në lagjen nr 10 në Korçë, u kapën duke vjedhur 11 koli me pije energjike, në banesën në përdorim të shtetasit K.I, 29 vjeç.

Materialet i kaluan Prokurorisë të Rrethit Gjyqësor Korçë për veprën penale : “Vjedhja” parashikuar nga neni 134/2 i Kodit Penal.”, thuhet në njoftimin  e Policisë. (D.D/Shuplaka)