Moderatorja Eni Vasili lexoi mbrëmë në studion e “Open” një mesazh të mbërritur në adresë të saj nga kreu i Partisë Demokratike, Lulzim Basha ndërsa përmes tij i adresohej një kërkesë kryeministrit Edi Rama që ishte i ftuar në emision, se nëse nuk menaxhon dot situatën e krijuar për shkak të koronavirusit, vinte ai dhe e bënte këtë punë.
Eni Vasili ka shpjeguar incidentin që ndodhi dje në emision që hapi një sërë reagimesh, për vërtetësinë e bisedës.
Gazetarja ishte e ftuar sot në në studion e lajmeve në Top Channel, ku tha se situata e krijuar nuk i lejonte dot verifikimin në kohë reale, se a ishte dërguar mesazhi nga Basha.
Ajo sqaroi se e ajo që e shqetëson më shumë në këtë situatë është cënimi i privatësisë, nëse mundësia e ndërhyrjes nga një haker është e vërtetë.
“Siç e shpjegova, në telefonin tim ka ardhur një SMS nga Basha kur unë po intervistoja kryeministrin Edi Rama. SMS-ja vinte në vazhdën e bisedës për intervistën e javës së shkuar. Në transmetim live nuk mendon se mund të ndodhë një hakerim, kur ke kryeministrin live, s’komunikon dot me kryetarin e PD, a je ti se kjo pyetje më duket e çuditshme? A je ti vërtet? Ndodhi që unë lexova një SMS, siç rëndom ndodh që kam lexuar sms nga të tjerë, nga personazhe apo qytetarë. Për mua, deri këtu s’ka asgjë të veçantë. Fakti që Basha e përgënjeshtroi flet diçka. Thonë që edhe mundet të hakerohet, unë s’jam eksperte. Jam dakord me PD-në, le të hetohet. S’mund të përdoret telefoni i një gazetareje të njohur dhe kryetarit të PD, se imagjinoni nëse ndodh me kryeministrin, jemi ne këtu, të vijë një sms “Edi Jam, mos lani më duart”. Është një çështje që mund të ketë të bëjë edhe me sigurinë kombëtare, nëse mundet të gjendet autori i kësaj shakaje të pakripë. Ti shkohet deri në fund, unë personalisht ndihem e prekur përderisa është prekur privatësia ime. Imagjinoni secili nga ju të marrë mesazhe nga persona që nuk i kanë dërguar”, tha Vasili ndër të tjera.
Discussion about this post