Sot, 130 vjet nga hapja e shkollës së parë shqipe

Në këtë 7 Mars mbushen plot 130 vite nga hapja e shkollës së parë shqipe. Mësonjëtorja e Korçës u hap më 7 mars 1887, një shtëpi e atëhershme e ofruar për mësimdhënie që sot është Muzeum Kombëtar i Arsimit.

Mësues dhe drejtor i parë i saj ka qenë Pandeli Sotiri. Gjithçka nisi me 35 nxënës, një shkollë që priste nga të gjitha shtresat. Vogëlushët e atëhershëm mësonin shkrim, këndim, gramatikë të Gjuhës Shqipe, Histori, Gjeografi, Aritmetikë, Dituri Natyrore dhe Edukim Fizik.

Mësonjëtorja e Korçës cilësohej që atëherë si qendër e rëndësishme për formimin kulturor dhe ngritjen e ndërgjegjes dhe moralit në popull. Ajo nxiti edukimin patriotik të brezit të ri e të masave të gjera. 

Kjo ngjarje u cilësua si një fitore e madhe për popullin shqiptar që përpara 130 viteve, duke marrë në konsideratë se mësimdhënia e atëhershme bëhej fshehurazi për shkak të pushtimit osman. Drejtues të saj ishin figura të njohura të Rilindjes shqiptare si: Pandeli Sotiri, Petro Nini Luarasi, Nuçi Naçi, Thoma Avrami. (XH.A/SHUPLAKA)