Ditën e sotme do të zhvillohet seanca gjyqësore për protestuesit e opozitës që janë arrestuar 3 ditë gjatë protestës. Të hënën mijëra qytetarë protestuan para parlamentit pasi ishin kundër zgjedhjes së Prokurorit të Përkohshëm. 6 prej tyre u arrestuan nga policia për prishje të rendit publik.
Sot disa prej deputetëve të PD-së si Gent Strazimiri, Myslym Murrizi, Klevis Balliu, Isuf Çela kanë shkuar në Gjykatën Penale, pranë burgut të Tiranës, për të marrë pjesë në seancën gjyqësore.
Ndërkohë, nënkryetari i Kuvendit, Edi Paloka, i proceduar po ashtu penalisht, bashkë me 9 deputetë të tjerë të opozitës do të jetë sot në mbledhjen e Byrose në orën 10.00. ku do të mbajë një qëndrim dhe do të largohet menjëherë.
DETAJE:
Tre ditë më parë policia njoftoi se: Specialistët e Seksionit për Krimet ndaj Jetës dhe Pronës në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësore Tiranë, në vijim të veprimeve për evidentimin, dokumentimin dhe kapjen e shtetasve që kundërshtuan me dhunë punonjësit e Policisë gjatë prostestës së opozitës të zhvilluar në datën 18 dhjetor 2017 para Kuvendit të Shqipërisë, kanë bërë arrestimin në flagrancë, të:
- Renato Xhihani, 19 vjeç, lindur dhe banues në Kavajë;
- Ervis Hajredini, 21 vjeç, lindur dhe banues në Lushnjë;
- Igli Hasani, 24 vjeç, lindur dhe banues në Lushnjë;
- Fanol Prifti, 40 vjeç, lindur dhe banues në Lushnjë;
- Sokol Vuçeta, 46 vjeç, lindur dhe banues në Shkodër (i dënuar më parë);
- Shyqri Proshka, 33 vjeç, lindur dhe banues në Kavajë.
Arrestimi u bë pasi gjatë protestës së djeshme, zhvilluar në sheshin në hyrje të Kuvendit të Shqipërisë nga subjekti politik Partia Demokratike e Shqipërisë, personat e sipërcituar në mënyrë aktive kanë kryer veprime të dhunshme, si: hedhja e sendeve të forta në drejtim të punonjësve të Policisë, hedhja e materialeve piroteknike, si dhe kanë kundërshtuar me dhunë punonjësit e Policisë në përmbushjen e detyrës, vepër penale e parashikuar nga neni 236/2 i Kodit Penal.
Gjithashtu janë proceduar në gjendje të lirë shtetasit:
- E.M, 17 vjeç, lindur dhe banues në Tiranë;
- S.L., 52 vjeç, lindur në Tropojë dhe banues në Tiranë.
Procedimi në gjendje të lirë i tyre u bërë pasi gjatë protestës kanë kryer veprime aktive në nxitjen e turmave dhe kanë ndihmuar me veprime aktive në prishjen e kordonit të Policisë, me qëllim hyrjen në ambjentet e brendshme të Kuvendit.
Si pasojë e veprimeve të dhunës nga personat e mësipërm, morën dëmtime të konsiderueshme trupore 6 punonjës Policie, të cilëve iu dha ndihma e parë dhe disa prej tyre vijojnë trajtimin mjekësor”. (J.V/Faxweb)
Discussion about this post