Një raport i fundit mbi hendekun gjinor nxjerr në pah se 56% e puënkërkueseve femra në Shqipëri janë të dekurajuara të kërkojnë një punë për shkak të pyetjeve që mund të hasin gjatë një interviste, ku pyetet për statusin civil, nëse është e martuar apo në një lidhje, nëse ka fëmijë.
Nga raporti i Hendekut Global Gjinor nga Forumi Ekonomik Botëror, rezulton se Shqipëria ka përmirësuar renditjen e saj me 8 vende krahasuar me një vit më parë, duke u listuar e 62-ta, megjithatë ajo vijon të jetë më e keqe se rreth 10 vite më parë në 2006-ën, kur ajo renditej në vendin e 61.
Indeksi mbështetet në katër shtylla bazë: në pjesëmarrjen në ekonomi dhe mundësit, nivelin arsimor, shëndetin dhe pushtetin në politikë, ku në këtë të fundit ka renditjen më të mirë, e 53-a në botë.
Por sa i përket shëndetit, gratë shqiptare renditen ndër të fundit si në rajon edhe në botë, duke u renditur të tretat nga fundi. Kjo kategori tregon për diferencat që kanë gratë dhe burrat në shëndet për sa i përket sëmundjeve kardiovaskulare, kancerit, diabetit, sëmundjeve respiratore, HIV/AIDS, vetëvrasjeve dhe kequshqyerjes.
Nëse në vitet ’90 pjesëmarrja e grave si forcë punëtore ishte 53%, sot ajo llogaritet rreth 51%, sipas të dhënave të INSTAT.
“Po sipas raportit të Forumit Ekonomik Botëror, bizneset me pronare femra përbëjnë rreth 12.5% të totalit. Ndërsa firmat që drejtueset (menaxheret e larta) i kanë femra janë vetëm 11.7% e totalit. Në Europë, 1 nga 3 gra ka pozicion drejtues. Krahasuar me rajonin renditemi të dytët, 14 vende pas Serbisë.”, shkruan “Monitor”.
INSTAT shprehet se në vitin 2015 ndërmarrjet e administruara ose drejtuara nga femrat zënë 31,3 % të ndërmarrjeve aktive gjithsej. Përqendrimi më i lartë i femrave si administratore ose drejtuese është në aktivitetin tregtar, me 36,5 %.
Si qark, ai i Tiranës ka përqëndrimin më të madh, me 47,5%, ndërsa qarku i Kukësit ka përqëndrimin më të ulët të ndërmarrjeve të drejtuara nga femrat, 5.6%.
(XH.A/SHUPLAKA)
