Gjatë ditës së sotme pritet të mblidhet asambleja e socialistëve, ku pritet që të behët edhe bilanci i 100 ditëve të para të qeverisjes. Po ashtu një zhvillim tjetër që kanë njoftuar socialistët është edhe vendosja e prioriteteve për këtë vit të ri që sapo ka nisur.
Një tjetër pikë që do të diskutohet është edhe struktura e re e bashkëqeverisjes me qytetarët. Për këtë do të ketë një raportim të Koordinatores Kombëtare për Bashkëqeverisje, Elisa Spiropali, e cila zëvendësoi Saimir Tahirin në këtë detyrë.
Po ashtu ka zëra se në mbledhjen e sotme sekretariati ekzekutiv do të pësojë ndryshime. Pritet të ketë emërtime të reja të sekretarëve, duke ndryshuar dhe funksionin e tyre, ndërsa nuk priten ndryshime të emrave aktualë.
Aktualisht 8 sekretarët e PS janë Bashkim Fino, Alfred Peza, Musa Ulqini, Stefan Çipa, Elisa Spiropali, Blerina Gjylameti, Ilir beqaj, dhe Taulant Balla, i cili prej muajsh mban postin e Sekretarit të Përgjithshëm të Partisë Socialiste. Në media kjo është cilësuar edhe si ”prerje kokash”.
Sigurisht që në Asamble fjalën e tij do të ketë edhe kryeministri Rama. Duhet thënë se në këto 100 ditë për ne që e shohim qeverisjen nga jashtë, vështirë të gjendet ndonjë arritje për tu shënuar.
Nuk mund të thuhet e njëjta gjë për skandalet që kanë përfshirë qeverinë, nga hetimet për Tahirin, te zgjedhja e njëanshme e kryeprokurores apo vota kundër SHBA-ve në OKB.
(E.K/FAXWEB)
