“Sot e shoh kokë ulur dhe gojë kyçur”, Pandeli Majko i përgjigjet Bashës për Teatrin Kombëtar: Pranoj…

Deputeti i PS-së dhe ministri për Diasporës Pandeli Majko i është përgjigjur kreut të PD-së Lulzim Basha pas deklaratave të tij për Teatrin Kombëtar.

Basha, i cili sot iu bashkua protestës së artistëve tek teatri, ndër të tjera tha se Rama ka pasur synim që herët prishjen e Teatrit Kombëtar, por është ndalur edhe falë socialistëve, ku veçoi emrin e Pandeli Majkos.

Por sot sipas Bashës, Majko është kokë ulur dhe gojë kyçur pasi Rama i ka të gjitha pushtetet.

Pas kësaj deklarate, përmes një postimi në ‘Twitter’ Pandeli Majko i ka kthyer përgjigje, ku thotë se për teatrin pranon kritika vetëm nga ata që kanë bërë sa “një gisht” më shumë si ai.

“… Për Teatrin Kombëtar pranoj komente vetëm nga ata politikanë që kanë bërë për të, “një gisht” më shumë se unë! Në vend që të merren me komente i këshilloj të shohin dramën “Vizita e damës plakë”… e 1991-shit. Të tjerat janë fjalë”, shkruan Majko. (B.H/Faxweb)