Sot kërciti dajaku, çfarë u thoshte Armando Subashi banorëve të Vërrisë: ‘As që bëhet fjalë’ (Foto)

Ndërtimi i një impianti mbetjesh në tokat e fshatit Vërri të Fierit, risolli pamjet e dhunës dhe përplasjes mes policisë dhe protestuesve.

Banorët pretendojnë se janë dhunuar rreth 20 persona, mes tyre 10 gra dhe disa fëmijë.

Pamjet e dhunës bënë xhiron në rrjetet sociale, duke u kujtuar shqiptarëve “Ligjin dhe Maliqin”.

Konflikti

Konflikti për ndërtimin e impiantit të mbetjeve në Fier, prej mëse dy vitesh ka hasur në kundërshtimin e banorëve të Vërrisë dhe Mbrostarit si dhe aktivistëve të mbrojtjes së mjedisit.

Banorët e kësaj zone thonë se ndërtimi i këtij impianti do të helmojë tokat bujqësore (të vetmen mundësi punësimi për ta), ndërsa ekspertët e mjedisit paralajmërojnë për ndotje të rrezikshme, jo vetëm në fshatin e Vërrisë.  

Sazan Guri, ambientalist, në prill të 2017-ës ka thënë:

“Unë e kam parë edhe projektin e Fierit, dhe asgjë nuk ndryshon nga ky i Elbasanit. Kështu që unë do të vazhdoj të jem në vijën e parë të protestave kundër këtyre impianteve të djegies së mbeturinave. Do të na e rrisin shumë më shumë nivelin e ndotjes të rrezikshme.”

Por si u ‘ul tensioni’ nga qeveria?

Qeveria shqiptare, me anë të të zgjedhurit lokal në Fier, Armando Subashit, pak javë para zgjedhjeve të 25 qershorit 2017, kur banorët e Mbrostarit bllokonin rrugët kundër këtij ndërtimi me anë të një reagimi në rrjetet sociale tha se qeveria nuk do e ndërtojë impiantin pa aprovimin e banorëve.

Subashi, madje tha se për këtë vendim ka patur dhe garancinë e Kryeministrit Rama.

“Sot mora garancinë e plotë nga kryeministri Edi Rama, që pa pëlqimin e banorëve të zonës (Verri, Kallm i Madh, Kallm i Vogël), as që bëhet fjalë të fillojë ndërtimin i impiantit të mbetjeve urbane, pavarësisht procedurave që janë ndjekur nga Ministritë deri tani. 
 Kjo është Rilindja! 
Kjo është Shqipëria që duam!
#ShtetPunëMirëqenie”-shkruante Subashi në prill të 2017-ës.

Sot në një konferencë për mediat nga Fieri, disa orë pas përplasjes së policisë me banorët, Armando Subashi tha se ndërtimi i impiantit do bëhet, duke ndryshuar qëndrimin e tij të 8 muajve më parë.

Subashi theksoi se toka është në pronës të familjes së Vrionëve, duke lënë të kuptohet se puna për ndërtimin e inceneratorit do të vazhdojë.

Subashi tha se akuzat për impiantin janë politike, ndërkohë që 8 muaj më parë premtoi se gjithçka do bëhej vetëm me aprovimin e banorëve. 

(F.G/Faxweb)