Deputetët e Kuvendit të Kosovës do të takohen sot për herë të 12-të në orën 10:00 për të tentuar përsëri konstituimin e organit ligjvënës. Ky proces ka ngecur në pikën e zgjedhjes së kryetarit të Kuvendit. Lëvizja Vetëvendosje ka nominuar Albulena Haxhiun për postin e kryetares së Kuvendit, por ky propozim nuk po mbështetet nga subjektet e tjera politike – PDK, LDK dhe AAK – të cilat e konsiderojnë Haxhiun si një figurë jo përbashkuese.
Seanca e sotme vjen pas 11 tentativash të pasuksesshme për konstituim të Kuvendit. Të hënën, Albin Kurti, kreu i Vetëvendosjes, i ka dërguar një letër kryetarit të Lidhjes Demokratike të Kosovës, Lumir Abdixhikut, me ftesën për bashkëqeverisje.
Pas kësaj, të martën, LDK mbajti një mbledhje të kryesisë, ndërsa Abdixhiku doli para mediave me një konferencë për shtyp. Gjatë saj, ai refuzoi një koalicion me Vetëvendosjen dhe në vend të kësaj propozoi formimin e një qeverie kalimtare.
“Kam pranuar një letër nga kryetari i VV-së. Duke pasur parasysh votuesit e kësaj partie, kam ndjerë detyrimin të rikujtoj qëndrimet tona ndaj çështjeve që janë ngritur. Pas një bllokade katërvjeçare dhe përballë rreziqeve për sigurinë kombëtare, bashkëpunimi me z. Kurti është i paimagjinueshëm. Por, për shkak të krizës së thellë institucionale, e cila buron pikërisht nga partia e parë, ne besojmë se është urgjente të gjendet një zgjidhje. LDK propozon nisjen e një procesi të ri politik, me pjesëmarrjen e të gjitha partive, për krijimin e një qeverie kalimtare,” deklaroi Abdixhiku.
Ai theksoi se kjo qeveri do të ishte me mandat të kufizuar – deri në zgjedhjen e presidentit të ri – dhe ftoi liderët e partive politike për një takim të përbashkët rreth kësaj iniciative.
Në fund, Abdixhiku nënvizoi se qëndrimi i LDK-së mbetet i pandryshuar, pavarësisht letrave apo ftesave të përsëritura, duke shtuar se nuk do ta zhgënjejë elektoratin e vet. Ai theksoi se qëllimi i LDK-së është të ofrojë një dalje nga kriza aktuale përmes një zgjidhjeje të përkohshme.
