Kryetarja e Komisionit të Ligjeve Klotilda Bushka ka munguar sot dhe në vend të saj, ky Komision u drejtua nga deputeti Eduard Ndreca. Gjatë mbledhjes, deputeti demokrat Dashnor Sula, ka propozuar që të miratohet një deklaratë nga anëtarët e komisionit për të distancuar veten nga kryetarja Klotilda Bushka.
Kjo kërkesë ka ardhur pas faktit që Bushka u pyet nga SPAK në lidhje me hetimet për dosjen e Erion Veliajt, ku dyshohet se ajo ka penguar hetimet ndaj tij.
Sula ka theksuar se veprimet e Klotilda Bushkës kanë dëmtuar rëndë imazhin e Komisionit të Ligjeve dhe se ato nuk mund të kalohen pa një qëndrim të qartë. Ai e ka cilësuar veprimin e saj si “të pafalshëm” dhe ka shtuar se veprime të tilla janë realizuar me vetëdije, duke penguar hetimet ndaj Veliajt.
Kjo kërkesë ka sjellë reagime të ndryshme brenda komisionit, ndërsa Sula ka insistuar se duhet të marrë masa për të mbrojtur integritetin e komisionit dhe të distancohet nga veprimet e një anëtari që ka vepruar në kundërshtim me të drejtën.
