Prokuroria e Posaçme kundër Korrupsionit dhe Krimit të Organizuar (SPAK) ka dhënë këtë të martë pretencën ndaj ish-kryebashkiakut të Pogradecit, Eduart Kapri, duke kërkuar dënimin e tij me 1 vit e 6 muaj burg për veprën penale të shpërdorimit të detyrës të kryer në bashkëpunim. Për shkak të gjykimit të shkurtuar, SPAK kërkon që dënimi të reduktohet në 1 vit heqje lirie.
Sipas SPAK, Kapri është marrë i pandehur pasi akuzohet se, me ndihmën e dy zyrtarëve të tjerë të bashkisë, ka lejuar përfundimin e punimeve të pezulluara të një pallati 12-katësh të shoqërisë Gedi sh.p.k, ku ai ka qenë administrator. Hetimet tregojnë se pas marrjes së detyrës si kryetar bashkie, Kapri e ka transferuar firmën në emër të të vëllait.
Organi i akuzës sqaron se pallati i ndodhur në lagjen nr. 3 të Pogradecit ka marrë dy kate shtesë, duke u bërë 14 kate në total, në kundërshtim me ligjin.
Për të njëjtën çështje, të pandehur janë marrë edhe juristi i bashkisë, Besjan Meço, dhe Besmira Niko, specialiste pranë Drejtorisë së Planifikimit dhe Zhvillimit të Territorit në Bashkinë Pogradec, të cilët gjithashtu përballen me akuzën e shpërdorimit të detyrës.
SPAK vijon ndjekjen e kësaj çështjeje, duke e konsideruar një rast të rëndësishëm në luftën kundër abuzimeve të zyrtarëve publikë.
Discussion about this post