Prokuroria e Posaçme kundër Korrupsionit dhe Krimit të Organizuar ka paraqitur konkluzionet përfundimtare në Gjykatën e Posaçme të Shkallës së Parë në ngarkim të të pandehurit Dritan Lleshi, i akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”.
SPAK kërkoi dënimin e tij me 1 vit burg, por për shkak të gjykimit të shkurtuar, i kërkoi gjykatës uljen e dënimit në 8 muaj.
Sipas hetimeve, në vitin 2019, Dritan Lleshi i ka premtuar shtetasit A.N, kundrejt shumës 400.000 lekë, punësimin e djalit të tij si inspektor mjedisi në Fier ose Lushnjë. Lleshi është prezantuar si person me lidhje familjare me një zyrtar të Ministrisë së Brendshme, përmes të cilit pretendonte se mund të ndikonte në rezultatin e konkursit për pozicionin në fjalë.
Kallëzimi penal është bërë në Drejtorinë Vendore të Policisë në Lushnjë, ku kallëzuesi deklaroi se kishte dorëzuar një kapar prej 200.000 lekësh, ndërkohë që premtimi për punësim nuk u realizua.
SPAK vlerëson se nga hetimi rezulton e provuar se i pandehuri ka ushtruar ndikim të paligjshëm, nëpërmjet premtimit të ndërhyrjes në një proces publik punësimi, për përfitim të padrejtë pasuror.
Ndërkohë, SPAK ka regjistruar procedim edhe në ngarkim të kallëzuesit A.N., i dyshuar për “ushtrim të ndikimit të paligjshëm ndaj personave që ushtrojnë funksione publike”, sipas paragrafit të parë të të njëjtit nen të Kodit Penal.
Seanca për dhënien e vendimit pritet të zhvillohet në ditët në vijim.
