Në ditën e fundit të merkatos, pavarësisht pritshmërive të mëdha, nuk ndodhi asnjë nga transferimet e bujshme, të parashikuara dhe të aluduara në media.
Madje edhe këtë vit si gjithmonë fundi i merkatos rezervoi surpriza të shumta por edhe dështime. Një ndër to ishte edhe Philippe Coutinho, i cili nuk do të shkojë te Barcelona, të paktën deri në muajin janar dhe tani do t’i duhet të rikthehet në ‘Anfield Road’ dhe të japë maksimumin për Liverpool.
Transferimi i tij te katalanasit nuk ndodhi sepse Liverpool refuzoi të gjitha ofertat e bëra nga drejtuesit e klubit spanjoll, të cilët shikonin te Coutinho zëvendësuesin ideal të Neymar, i cili u largua te PSG. Edhe Liverpool nga ana tjetër, nuk arriti të transferojë në kohë mbrojtësin holandez të Southampton, Wirgil Van Dijk, të cilin trajneri Klopp e kërkoi me ngulm.
Një tjetër tenativë e dështuar në merkato ishte transferimi i Alexis Sanchez te Manchester City. Kiliani ishte vetëm një firmë larg bashkimit me Pep Guardiolën te Manchester City, Sanchez nuk ka aspak marrëdhënie të mira me Arsen Wenger dhe kërkoi me çdo kusht transferimin në Manchester, por pa sukses.
Në fund, Arsenal vendosi të ndalojë këtë transferim, me arsyetimin se nuk kishte kohë mjaftueshëm për të afruar Thomas Lemar nga Monako, si zëvendësues të kilianit.
