Pas akuzave të bëra publike nga ish-kryeministri Berisha në drejtim të ish-shefes së doganave Spiropali vjen reagimi i kësaj të fundit. Përmes ‘’qytetarit dixhital”, Berisha e akuzonte Spiropalin për afera korruptive disa milionëshe gjatë kohës që drejtonte doganat. Sipas tij, në drejtorinë e doganave kanë ardhur dokumentacione nga Greqia që e vërtetojnë këtë fakt.
Spiropali e ka kujtuar doktorin që pas një moshe të caktuar, përdorimi i tepruar i rrjeteve sociale mund të shkatërrojnë jo vetëm karrierën por edhe stabilitetin mendor.
Reagimi i plotë:
‘’I dashur Doktor,
Sot “New York Times” shkruante se përdorimi i shumtë i rrjeteve sociale të shkatërron karrierën dhe në fund të hedh në erë edhe psiken. Doktor, në djall karriera pa kthim, ruaj të paktën psiken.
Hiq dorë nga ai spiuni dixhital. Nuk është serioze. Merru me gjëra më të fisme në këtë muzg të jetës.
Nuk di a të tha ai doganieri dixhital se e kishe kthyer doganën në pronë të Shikut të Gazidedes dhe katër nëndrejtorët e përgjithshëm i kishe nga fshati yt. Të ardhurat e shtetit zhdukeshin pa gjurmë nëpër xhepat e klanit tuaj primitv. Vetëm në një vit e gjysëm pas batërdisë tënde në kohën që unë drejtova doganën mblodhëm 300 milionë dollarë më tepër se e njëjta periudhe e kohës tënde nepotike, dhe siguruam rritjen më të lartë të të ardhurave në dhjetë vitet e fundit. Vetëm nga akciza e naftës së zhdukur nga klani shiks, siguruam rritje rekord prej 17 përqind. Mbi të gjitha i kthyem doganës fizionominë shtet-ndërtuese.
Nëse ekziston, bëji të fala doganierit tënd dixhital, ndonjë mi mbetur skutave të doganës, nga koha jote e vdekur’’.
Discussion about this post