Trajneri i Partizanit, Sulejman Starova, në deklaratën pas ndeshjes me Korabin për “Supersport”, u shpreh jo plotësisht i kënaqur nga loja e sotme pasi ekipi i tij nuk arriti të shënonte dhe golin e qetësisë. Shkëputjen e Kukësit në krye ai e komentoi me një batutë.
“Ne nuk ishim të çliruar gjatë ndeshjes së sotme sepse nuk arritëm të shënonim golin e dytë që do na e bënte më të thjeshtë punën. Megjithatë morëm 3 pikët dhe kjo është më e rëndësishmja”, tha Starova për ndeshjen.
Sa i përket ndeshjes së ardhshme me Skënderbeun dhe shkëputjes së Kukësit, Starova ka bërë një krahasim shumë interesant.
“Për Skënderbeun jemi gati pa diskutim. Edhe po të mos jesh gati nuk të lë tjetri sepse thotë hajde se kemi ndeshje. Ndërsa për shkëputjen e Kukësit do të bëja një krahasim si në garat e çiklizmit, njëri do çajë erën, tjetri do vijë nga mbrapa.”
Partizani fitoi sot përballë Korabit me rezultatin 1-0 duke arritur Skënderbeun në vend të dytë, ndërsa ekipi korçar u mund nga Kukësi me rezultatin 2-0. (A.R/SHUPLAKA)
Discussion about this post