Lacio ka arritur të mposhtë me rezultatin 3-1 në shtëpi Torinon në ndeshjen e vlefshme për javën e 28 të Serisë A. Portieri shqiptar Thoma Strakosha luajti sërish për 90 minuta të plota, por sot pësoi gol pas 3 ndeshjeve ku e kishte ruajtur portën e paprekur.
Imobile kaloi Lacion në avantazh në minutën e 56, por në të 72-tën Maksi Lopez rivendosi barazinë në shifra. Megjithatë të besuarit e Simone Inzagit nuk u dorëzuan duke gjetur rrjetën edhe 2 herë të tjera falë golit të Keita në minutën e 87 dhe Anderson në minutën e 90. Mbrojtësi shqiptar i Torinos, Arlind Ajeti, e ndoqi të gjithë takimin nga stoli i rezervave.
Pas kësaj ndeshjeje, Lacio u ngjit në kuotën e 56 pikëve duke mbajtur vendin e 4-t në renditje, 4 pikë larg Napolit të vendit të 3-të. Lufta për një vend në Ligën e Kampionëve sezonin e ardhshëm mbetet e hapur, teksa veç Lacios, edhe Interi që ka dy pikë më pak se kryeqytetasit pretendon dhe shpreson deri në fund. Ndërkohë Torino mban vendin e 10 me 39 pikë. (E.K/SHUPLAKA)
