Dosja e 21 Janarit, e hapur në Strasburg prej familjarëve të viktimave që në vitin 2013, duket se është mbyllur përfundimisht.
Gjykata e Strasburgut e ka pushuar çështjen, pasi familjarët e viktimave kanë rënë dakort me dëmshpërblimin e propozuar nga qeveria shqiptare.
Pas kërkesës së familjarëve për të rihapur çështjen, qeveria shqiptare në 2016-ën, më saktë në muajin dhjetor të 2016-ës, dërgoi një letër drejt Gjykatës së Strasburgut, ku deklarohej e gatshme të rihapte çështjen dhe të negocionte me familjarët e viktimave për kushtet e dëmshpërblimit.
“Gjykata vlerëson se duke parë dakordësinë e paditësve me deklaratën e bërë nga qeveria, çështja duhet konsideruar si një marrëveshje me mirëkuptim mes palëve”, thuhet në vendimin e Strasburgut.
93,600 euro ishte shpërblimi i propozuar nga qeveria për familjarët e Ziver Veizit: 39 mijë për bashkëshorten, 39 mijë për të birin, dhe 15,600 euro për të vëllain e viktimës Çaush Veizi.
Ndërkohë për Zabit Dedën, vëllain e Hekuran Dedës (gjithashtu një prej viktimave të 21 janarit) qeveria ka propozuar një dëmshpërblim prej 15,600 eurosh. Kështu, katër të afërmit janë dëmshpërblyer me 109 mijë euro. (D.D/Shuplaka)
Discussion about this post