Nga Artan Fuga
Gabimi më i madh postërmetor do të ishte të vijohej me të njejtin model urbanizimi si më parë.
Kokëfortësia – armiku ynë kryesor! Pas ka interesa të vockla egoiste sigurisht!
Kurrë mos ndodhtë, por cfarë do të bënim nëse natyra përsëri do të na godiste pas një viti?
Pra, duhet ta evitojmë një tragjedi tjetër.
Nëse paratë e mbledhura ose ato të BE do t’i harxhonim duke ribërë të njejtat gabime urbanistike, kriminale, harram i paçim të gjitha!
Një katastrofë natyrore veç anës tragjike, jep edhe një shans, shansin për të filluar jetën, pra modelin urban, nga e para!
Kjo jo vetëm shtëpitë e prishura, por edhe banesat e paprekura por që rrezikojnë më pas.
Pa zhvendosje gjeografike lagjesh qytetesh, ose qytetesh të tëra, për një periudhë njezetvjeçare, ne do t’i mbyllnim edhe brezat e ardhmë si minjtë në ankthe kolektive të ardhshme!
Qytetërimi i arbërit do të vihej në rrezik permanent!
Mos nxitohemi!
Ta mendojmë mirë çështjen!
Duhet plan strategjik urbanizimi!
Tirana duhet të shkojë më shumë drejt Dajtit dhe kodrave në drejtim të Elbasanit dhe nuk mund të zhytet në një kaos urban.
Durrësi drejt kodrave përreth drejt Lindjes dhe Jugut!
Qytete satelite duhet të zmadhohen për t’a shfryrë densitetin demografik të qyteteve në fjalë.
Urbanizimi që kemi sot është i shekullit të kaluar.
Mbi të gjitha binatë mbi pesë kate nuk duhet më të kenë vend në planimetrinë tonë vertikale.
Investimet publike të bëhen në rrugë dhe menaxhim ujrash në zonat e reja urbane, atje ku studimet gjeofizike japin siguri.
Urbanizimi i ri ka nevojë për një debat gjithëpërfshirës!
Këtu opozita, intelektualët, qytetarët, komunitetet duhet të përfshihen në përqasje politike, politikash urbanizimi, në dialog por edhe në rrezistencë ndaj kujtdo që interesat e veta e çojnë në rrugë tjetër.
Qytetet moderne sot janë ngritur kryesisht pas katastrofave të mëdha natyrore ose luftrave shkatërrimtare me një urbaniziëm të ri.
Ky do të ishte “shkatërrimi krijues” që aq shumë citohet në botë me autor Schumpeter.
