Kryetari i Bashkisë së Tiranës Erion Veliaj, është detyruar të anulojë një takim të paramenduar me studentët e Universitetit të Tiranës.
Ky takim ishte organizuar nga të rinjtë e FRESSH-it, por studentët dhe aktivistët e “Lëvizjes për Universitetin” nuk kanë lejuar që ambientet e universitet të përdoren për veprimtari partiake.
Aktivistët kanë kërkuar që takimi të jetë i hapur, siç parashikohet nga ligji i arsimit të lartë.
“Në shkelje të ligjit të arsimit të lartë dhe rregullores së Universitetit të Tiranës, që ndalojnë veprimtaritë politiko-partiake në mjediset universitare, sonte në orën 17:00 ishte parashikuar të mbahej një takim me kryetarin e bashkisë së Tiranës Erion Veliaj, i organizuar nga FRESSH-i. Një grup aktivistësh të Lëvizjes Për Universitetin u futën në sallën e takimit për t’i përballur organizatorët me shkeljen e ligjit dhe rregullores, si edhe për t’i kujtuar z. Veliaj përgjegjësinë e tij (jo vetëm) politike për vrasjen në punë të Ardit Gjoklajt, të riut që punonte skllavërisht në landfillin e Sharrës që të kishte mundësi të vazhdonte shkollën. Përderisa dyert e jetës dhe universitetit janë të mbyllura për Arditët, këto të fundit nuk kanë pse të jenë të hapura për pushtetarët keqbërës. Për shkak të këmbënguljes sonë, takimi u anulua. Rezistenca sjell efekte. Sonte Universiteti i Tiranës ka një turp më pak në fytyrën e vet”, shkruhet në faqen e Facebook të “Lëvizjes për Universitetin”. (D.D/Shuplaka)
