Studentët e fakultetit të matematikës në Universitetin e Shkencave të Natyrës janë ngritur kundër mitmarrjes.
Ata sot kanë vendosur një parullë ku shkruhet “boll i zhvatët studentët, mr. 700 euro”. Studentët i referohen pedagogut Thanas Xhillari që sipas tyre kërkon 700 euro për një notë kaluese.
Ndërkohë që “Lëvizja për Universitetin”, nëpërmjet një postimimi në ‘Facebook’ ka thënë se në vijim të aksioneve ndërgjegjësuese për problematikat e jetës universitare, sot u mbajt aksioni i radhës në Fakultetin – famëkeq – të Shkencave të Natyrës.
Postimi i plotë:
“Në vijim të aksioneve ndërgjegjësuese për problematikat e jetës universitare, sot u mbajt aksioni i radhës në Fakultetin – famëkeq – të Shkencave të Natyrës. Aksioni nuk denoncon vetëm zhvatjen që iu bëhet studentëve nga tarifat e larta të studimeve, por edhe zhvatjen me tregtinë e pandershme të librave, dhe më keq akoma në disa raste edhe zhvatjen e studentëve nga disa pedagogë super të korruptuar që shesin me qindra euro një notë provimi.
Aksionet tona do të vazhdojnë derisa të marrin fund tarifat dhe çdolloj haraçi në kurriz të studentëve.
Arsim Publik Falas!
(B.H/Faxweb)
