Një studim i shumëpritur i pilulës COVID të “Pfizer”-it konfirmoi se ajo ndihmon në parandalimin e sëmundjeve të rënda, njoftoi kompania të martën.
“Pfizer”-i tha gjithashtu se pilula e saj antivirale funksionoi në studime laboratorike kundër variantit “Omicron”, i cili po rritet në Afrikën e Jugut dhe Evropë dhe pritet të mbizotërojë rastet në SHBA gjatë javëvë në vijim.
“Ne kemi besim se, nëse autorizohet ose miratohet, ky trajtim i mundshëm mund të jetë një mjet kritik për të ndihmuar në shuarjen e pandemisë”, tha në një deklaratë Albert Bourla, shefi ekzekutiv i “Pfizer”-it, raporton “NY Times”.
Muajin e kaluar, “Pfizer”-i i kërkoi Administratës së Ushqimit dhe Barnave në SHBA të autorizojë pilulën, e njohur si “Paxlovid”, duke u bazuar nga të dhënat grupore paraprake. Rezultatet e reja pa dyshim do të forcojnë aplikimin e kompanisë, që mund të nënkuptojë se amerikanët e infektuar me virus mund të kenë qasje në pilulën brenda javësh.
Në njoftimin e së martës, “Pfizer”-i tha se nëse jepet brenda tri ditëve nga fillimi i simptomave, “Paxlovid” ul rrezikun e shtrimit në spital dhe vdekjes me 89 për qind. Nëse jepet brenda pesë ditëve, rreziku reduktohej pothuajse po aq, në 88 për qind.
Rezultatet, duke u bazuar në një analizë të 2.246 vullnetarëve të pavaksinuar me rrezik të lartë të sëmundjes së rëndë, u përputhën me analizën e saj fillestare më të vogël të provës klinike, e publikuar muajin e kaluar.
“Pfizer”-i tha se 0,7 për qind e pacientëve që morën “Paxlovid” u shtruan në spital brenda 28 ditëve nga hyrja në provë dhe asnjë nuk vdiq. Në të kundërt, 6,5 për qind e pacientëve që morën një “placebo” u shtruan në spital ose vdiqën.
Kompania lëshoi gjithashtu të dhëna paraprake nga një provë e veçantë që monitoronte njerëzit me rrezik më të ulët. Këta vullnetarë përfshijnë njerëz të vaksinuar që mbanin një faktor rreziku për sëmundje të rëndë, si dhe pacientë të pavaksinuar pa faktorë rreziku.
Midis këtij grupi prej 662 vullnetarësh, “Paxlovid” uli rrezikun e shtrimit në spital dhe vdekjes me 70 për qind, tha kompania.
Mikael Dolsten, shefi shkencor i “Pfizer”-it, ishte i emocionuar për rezultatet pasi kishte mbikëqyrur zhvillimin e ilaçit që nga pranvera e vitit 2020, me më shumë se 200 shkencëtarë të kompanisë që hartuan molekulën dhe më pas e testuan atë te kafshët dhe njerëzit.
Ndërsa ilaçi ishte në zhvillim, dr. Dolsten shpresonte se mund të ishte 60 për qind efektiv. Fuqia e tij e vërtetë e la atë të habitur. “Ia dolëm me të vërtetë të ngjitemi në krye”, tha ai në një intervistë.
Në të dy provat shumica e vullnetarëve ishin të infektuar me variantin “Delta”. Por “Pfizer”-i tha të martën se në eksperimentet laboratorike “Paxlovid” gjithashtu performoi mirë kundër variantit “Omicron”. Ilaçi bllokohet në një nga proteinat kryesore të “Omicron”-it, e quajtur proteazë – po aq efektshëm sa në variantet e tjera, zbuloi “Pfizer”-i, transmeton Zeri.info.
Lajmi i mirë i “Pfizer”-it erdhi pasi rivali i saj, “Merck”, priste fjalën për autorizimin e pilulës së saj antivirale, e njohur si “Molnupiravir”. Në tetor, “Merck” dhe partneri i saj “Ridgeback Biotherapeutics” njoftuan se pilula uli rrezikun e shtrimit në spital dhe vdekjes nga COVID-19 me 50 për qind nëse merret brenda pesë ditëve nga fillimi i simptomave.
Por sapo kompanitë kryen një analizë përfundimtare mbi të gjitha të dhënat e tyre, efektiviteti ra në 30 për qind. Në një takim të komitetit këshillimor të FDA-së muajin e kaluar, një numër ekspertësh reaguan me gjakftohtësi ndaj këtij efektiviteti modest, veçanërisht duke pasur parasysh disa shqetësime për sigurinë e pilulës.
Komiteti votoi ngushtë në favor të autorizimit të “Molnupiravir”-it. Por tani, dy javë më vonë, FDA-ja ende nuk ka bërë të ditur nëse do ta autorizojë atë. Ndërkohë, Franca ka refuzuar aplikimin e “Merck”-ut, duke përmendur efektivitetin e saj modest dhe shqetësimet për sigurinë. Britania autorizoi “Molnupiravir”-in muajin e kaluar.
Dr. Dolsten tha se “Pfizer”-i do të kishte gati 180.000 doza trajtimi nëse “Paxlovid”-i do të autorizohej së shpejti dhe se kompania planifikon të vërë në treg 80 milionë doza në mbarë botën në vitin 2022.
“Pfizer”-i do të fitojë një shumë të madhe parash nga bari. Banka e investimeve “SVB Leerink” vlerësoi se “Paxlovid”-i do të sillte 24 miliardë dollarë të ardhura globale në 2022 dhe 33 miliardë dollarë në vitin 2023. Kjo do t’i jepte “Paxlovid”-it një nga shitjet më të larta njëvjeçare të çdo produkti mjekësor në histori.
Deri më sot vetëm një produkt tjetër ka sjellë më shumë të hyra: vaksina COVID e “Pfizer”-it.
