Studimi “Punonjësit në hije, Ekonomia e Fshehur dhe Puna e Padeklaruar në Maqedoni, Shqipëri dhe Kosovë”, i realizuar nga CRPM në Maqedoni, Instituti për Demokraci dhe Ndërmjetësim (IDM) në Shqipëri dhe D4D në Kosovë vë në dukje rekordin që Shqipëria shënon në rajon mbi taksimin e individëve.
Norma progresive prej 23%, për pagat mbi 130 mijë lekë (rreth 930 euro) është unike në gjithë rajonin, që i taton të ardhurat nga paga mesatarisht me 9-11%
Punonjësit shqiptarë me paga të larta rezultojnë se në raport me ata të Kosovës dhe Maqedonisë, janë më të prirur të mos deklarojnë të ardhurat e tyre.
“Sistemi tatimor progresiv i implementuar në Shqipëri, pa masa pozitive për të nxitur punonjësit me paga të larta të deklarojnë punën dhe të paguajnë taksat e tyre, mendohet të rrisë nxitësit për aktivitete të fshehura ekonomike d.m.th evazion fiskal”, citohet në studim.
Ata persona që janë anketuar në studimin e përbashkët janë shprehur se janë dakord me pohimin “Do të preferoja të isha një punonjës i padeklaruar me një pagë më të lartë sesa i deklaruar me një rrogë më të ulët”, shkruan “Monitor”.
Për vendin tonë rezulton se niveli i pranimit rritet për individët më të ardhura të larta (>728 euro). Ndryshe nga Kosova dhe Maqedonia, ku konstatohet se në rastin e mosrënies dakord me pohimin (Do të preferoja të isha një punonjës i padeklaruar me një pagë më të lartë sesa i deklaruar me një rrogë më të ulët) kurba ka tendencë rritëse me rritjen e nivelit të të ardhurave, në Shqipëri, ata punonjës shqiptarë që jetojnë në familje që fitojnë deri në 728 euro, pajtohen dhe nuk pajtohen me deklaratën, në përqindje relativisht të ngjashme me atë që mund të shihet në Maqedoni dhe Kosovë.
Megjithatë, niveli i pranimit bie nga 65% në 61% për punëmarrësit më të pasur, të cilët kanë më tepër të ardhura se 728 euro. Ajo që vihet re në Shqipëri është se me rritjen e të ardhurave, ulet mospranimi me deklarimin e sipërpërmendur. (XH.A/SHUPLAKA)
Discussion about this post