Suedia është ndër vendet që bëri diferencën në masat e marra për sa i përket frenimit të pandemisë.
Vendi skandinav nuk ishte aq drastik në masa duke ua lënë qytetarëve të saj që të vetëizoloheshin. Mirëpo autoritetet suedeze e kanë pranuar se kanë dështuar që t’i mbrojnë si duhet personat e moshuar nga koronavirusi. Rretj gjysma e viktimave në këtë shtet janë shënuar në shtëpitë për kujdesin ndaj të moshuarve.
Masat e buta që i kishte marrë Suedia për luftimin e pandemisë kanë qenë kundërthënëse dhe janë kritikuar nga shumë infektologë dhe ekspertë të shëndetit publik “Ne dështuam që t’i mbrojmë të moshuarit tanë. Kjo është vërtet serioze dhe një dështim për shoqërinë tonë si tërësi. Ne duhet të mësojmë nga kjo, nuk kemi mbaruar punë akoma me pandeminë”, tha ministrja e shëndetësisë dhe e punëve sociale, Lena Hallengren, për televizionin publik.
Deri më tani, në Suedi nga koronavirusi kanë vdekur 3,220 persona. Ndonëse shteti kishte thënë se mbrojtja e personave mbi moshën 70-vjeçare është prioritet, 90 për qind e personave që kanë vdekur deri më 28 prill ishin mbi këtë prag të moshës.
