Rusia ka ndërmarrë sulmin më të madh ajror ndaj Ukrainës që nga nisja e luftës, thanë zyrtarët ukrainas të dielën, duke e cilësuar si një përshkallëzim të rëndë që vë në rrezik çdo përpjekje për paqe, tre vite pas shpërthimit të konfliktit.
Sipas Forcave Ajrore të Ukrainës, Rusia lëshoi gjithsej 537 armë ajrore, duke përfshirë 477 dronë si dhe 60 raketa të llojeve të ndryshme. Nga këto, 249 u asgjësuan nga mbrojtja ajrore, ndërsa 226 dyshohet se u neutralizuan nga sistemet e bllokimit elektronik.
Zëdhënësi Yuriy Ihnat tha për Associated Press se ky ishte “sulmi më masiv ajror ndaj vendit, duke përfshirë të dyja, raketat dhe dronët”.
Goditjet ruse prekën edhe rajone të largëta nga fronti lindor, përfshirë edhe Ukrainën perëndimore.
Për shkak të rrezikut të shtrirjes së sulmeve, Forcat Ajrore të Polonisë dhe aleatët e NATO-s ngritën në ajër avionët e tyre për të mbrojtur hapësirën ajrore polake, njoftuan autoritetet në një deklaratë zyrtare.
