Drejtori i Përgjithshëm i policisë Haki Çako ndodhet në një takim me drejtuesit e policisë së Elbasanit. Ky takim vjen pas incidentit në këtë qytet, ku u godit mjeti i zv. drejtorit të policisë së këtij qyteti.
Mjeti i Gjergj Oshafit u godit nga një mjet luksoz i cili mësohet se ishte në pronësi të shtetasit Petrit Çela. Nuk dihen ende detaje nga takimi i kreut të Policisë, ndërsa priten detaje të reja.
Mbrëmjen e së hënës, në rrugën “Dyli Haxhire”, policia zhvilloi një kontroll për makinat luksoze, ku konstatuan një “Range Rover” me targa AA 040 OJ dhe me vlerë 100.000 euro dhe i kërkuan drejtuesit që të shoqërohej për verifikim të dokumentacionit. Në momentin që ky mjet po shoqërohej, një mjet tip “Audi” goditi në befasi makinën e policisë me targa MB 002 AA. Më pas autorët janë futur në ambientet e tregut agro-ushqimor.
Fill pas kësaj ngjarje, policia arrestoi shtetasit Ledio Zabeli, 26 vjeç dhe Kelmend Xhaferri, 35 vjeç, ku ky i fundit drejtonte mjetin që u ndalua fillimisht për kontroll, ndërsa Zabeli ishte pasagjer. Më pas policia prangosi edhe rojën e tregut agro-ushqimor Valmir Dedja, i cili pengoi oficerët e policisë për të ushtruar kontroll.
Për “Audin” e blinduar u raportua se ishte në pronësi të biznesmenit Petrit Çela, ndërsa në momentin e ngjarjes drejtohej nga djali i tij. (J.V/Shuplaka)
Discussion about this post