Sulmi ndaj xhamisë në Egjipt, Meta: Ngushëllime të ndjera familjarëve të viktimave

Për sulmin terrorist në një xhamin në Egjipt ku u vranë më shumë se 300 persona dhe u plagosën dhjetra të tjerë ka reaguar dhe Presidenti Meta.

Në një letër drejtuar homologut të tij, Meta shpreh ngushëllimet për familjet e viktimave dhe dënon aktin duke e cilësuar barbar.

MESAZHI I METËS:

I nderuar Zoti President, Jam shumë i tronditur nga sulmet e sotme mizore terroriste që goditën një prej Xhamive të Sinait e ku humbën jetën qindra besimtarë të pafajshëm e dhjetra të tjerë u lënduan. Më lejoni që përmes Jush, t’i shpreh ngushëllimet më të ndjera e të sinqerta familjarëve e të dashurve të viktimave, ndërsa të lënduarve t’i uroj shërim të shpejtë e kthim sa më parë në jetën normale.

I dënoj me forcë këto akte barbare terroriste, që synojnë të frikësojnë shoqërinë egjiptiane dhe të kërcënojnë sigurinë e Egjiptit e të rajonit. Ju siguroj se, në këto momente të vështira e të dhimbshme, si dhe në luftën kundër terrorizmit e ekstremizmit të dhunshëm, unë dhe populli shqiptar jemi me Ju dhe popullin egjiptian.

(E.K/Faxweb)