Sulmi në Barcelonë, reagon Ambasada Shqiptare në Madrid: Nuk ka shqiptarë të lënduar

Pas sulmit tragjik në Barcelonë, ku deri më tani shënohen 13 viktima dhe rreth 50 të plagosur, ka reaguar Ambasada Shqiptare në Madrid.

Sipas Ambasadës, në sulmin terrorist që goditi sot Barcelonën nuk janë evidentuar shtetas shqiptarë në vendngjarje.

Megjithatë, ambasada u bën thirrje shtetasve shqiptarë në Barcelonë që të shmangin vendin e aktit terrorist si edhe të ndjekin udhëzimet e autoriteteve lokale.

“Për çdo informacion ata janë të lutur të kontaktojnë në numrin 0034667673333.”, thuhet në njoftimin e ambasadës.

Kujtojmë se një furgon u fut sot mes një turme turistësh në Barcelonë, duke shkaktuar 13 të vdekur dhe dhjetëra të plagosur.

Incidenti ka ndodhur pak orë në “La Rambla”, një rrugë e njohur e cila vizitohet nga turistët por që CIA e ka paralajmëruar si target terrorizmi. Pas aksidentit, shoferi i furgonit është larguar menjëherë nga vendngjarja.

Mediat spanjolle raportojnë se autoritetet janë në kërkim të shoferit të automjetit që u arratis menjëherë pas incidentit. Ndërkohë shërbimet e urgjencës i kanë bërë thirrje që njerëzit të qëndrojnë larg zonës.

Fillimisht u tha për një aksident, por tani ngjarja po trajtohet si sulm terrorist.

Përplasja ka ndodhur para restorantit hebre “Maccabi”, detaj i cili ka ngritur dyshimet për një sulm me prapavijë fetare dhe racore.

(D.D/Shuplaka)