Një muaj pas sulmit në Dortmund ndaj autobusit që po transportonte ekipin e Borusia Dortmundit nga hoteli në stadium për ndeshjen ndaj Monakos në Ligën e Kampioneve, zyra e prokurorëve federalë në Gjermani ka thënë se nuk kanë gjetur asnjë të dhënë se sulmi kishte “prapavijë terroriste”.
“Hetimet e kryera deri më tani nuk kanë treguar asnjë të dhënë që thotë se ky sulm ka pasur prapavijë terroriste”, kanë thënë prokurorët në një njoftim.
Policia gjermane ka arrestuar një 28-vjeçar më 21 prill me kombësi gjermano-ruse, si të dyshuar për sulmin me bombë ndaj autobuzit. Ai dyshohet se ka organizuar sulmin me qëllim rrëzimin e vlerës së aksioneve të klubit gjerman në bursë në mënyrë që të përfitonte shuma të mëdha parash duke spekuluar më pas me vlerën e tyre.
Sipas raportimeve të mediave gjermane, i arrestuari kishte bërë një plan që mund t’i siguronte atij një fitim deri në 3.9 milion euro.
Në të njëjtin përfundim dalin edhe sot prokurorët të cilët thonë se i dyshuari Sergei V., e ka kryer sulmin “për arsye të pastra monetare”.
Pas ngjarjes ku mbeti i dëmtuar lehtë në dorë mbrojtësi Mark Bartra, bota e futbollit u bë bashkë në mesazhet e solidaritetit ndaj ekipit gjerman. (D.D/Shuplaka)
