Mbrëmjen e djeshme i ftuar në një studio televizive ministri i Brendshëm Sandër Lleshaj teksa pyetej për grabitjen e parave në Rinas, hodhi tezën se ato mund të ishin djegur.
Pa treguar hetimet që mund të kanalizoheshin në këtë pikë, Lleshaj duket se iu dha një alibi grabitësve, të cilët edhe ne rast se arrestohen, mund të justifikohen me faktin se paratë i kanë djegur.
Lidhur me këtë deklaratë aspak serioze të Lleshajt ka reaguar dhe gazetari Denis Dyrnjaja, i cili shkruan:
Perla ministrore!
Sa herë Ministri i Brendshëm flet, surprizon. P.sh së fundi z Lleshaj tha në një intervistë televizive se paratë e grabitura në Rinas mund të jenë djegur, duke shtuar se gjithesesi kjo ishte një hamendësi spekulative.
Në rastin më të mirë ky është një naivitet që konsiderohet një supergafë pasi iu jep grabitësve një opsion për të deklaruar se paratë i kanë djegur edhe nëse kapen dhe në rastin më të keq (po përdor dhe unë termin e përdorur nga ministri) pra po spekuloj, duke menduar se z Lleshaj po paralajmëron se autorët do të kapen, por paratë nuk do të gjenden.
Dhe nëse vërtet do shpallet versioni se paratë ishin djegur hijet e dyshimit se grabitja e Rinasit nuk ishte aq spontane e një grupi prej 4 vetësh rritet shumë. Gjithnjë në mënyrë spekulative unë paramendoj se paratë nuk do të gjenden. Tani të presim a do të jenë “djegur” vallë ato siç tha Ministri i Brendshëm?!
(E.K/FAXWEB.AL)
Discussion about this post