Ish- deputetja e PD-së, Jorida Tabaku ka reaguar me një deklaratë në lidhje me procesin e rindërtimit të premtuar nga qeveria për banorët që u preken nga termeti i 26 nëntorit.
Tabaku thotë se “qeveria po gënjen qytetarët në lidhje me fondet e rindërtimit, duke shkruar se janë alokuar vetëm 20 % të vlerës së rindërtimit për 2020 dhe se mban me shpresa firmat e lidhura me to tendera rindërtimesh se do të marrin fonde nga vendet e BE”.
Kjo deklaratë e ish-deputetes demokrate vjen pas deklaratës së Ramës i cili tha se për shkak të pandemisë ka pasur një vonesë në fonde, por buxheti për rindërtimin nuk është prekur dhe nuk do të preket nga pandemia.
Deklarata e Plotë
“Me një buxhet të shkatërruar nga korrupsioni dhe PPP-të me një arkë të mbushur këto 7 vjet nga taksat e larta, i qartë se konsumi po bie pikiatë dhe se shqiptarët do të kalojnë krizën më të madhe ekonomike pas pandemisë, Rama gjen guximin të flasë për buxhete rindërtimesh.
I bindur se me propagandë do ta mposhtë realitetin edhe kësaj here ai flet për buxhetin e rindërtimit pasi gënjeu shqiptarët për buxhetin anti-COVID. U thotë shqiptarëve se asnjë qindarkë nuk preket në buxhetin e rindërtimit dhe nuk u shpjegon të vërtetën. Sipas shkresës së qeverisë janë alokuar vetëm 20% e vlerës së projektit për rindërtimet në 2020. Pra kryeministri dhe pinoku në krye të Tiranës apo dhe të emëruarit në rrethe po tenderojnë pa fonde të disponueshme në buxhet. Po u japin firmave të lidhura me to tendera rindërtimesh me shpresën se do të marrin fonde nga vendet e BE. Por për shqiptarët e prekur sa nga tërmeti dhe nga pandemia ekonomike ndihma ishte qesharake. Mbështetja reale në ekonomi qe 0.8% e PBB megjithëse në 7 vjet me radhë shqiptarët kanë paguar taksat më të larta në rajon.
Për 7 vjet me radhë, RAMAVIRUSI e ka gërryer ekonominë, shëndetësinë, dhe mirëqenien e shqiptarëve, CORONAVIRUSI thjesht po i jep dorën e fundit duke nxjerre dështimet e keqqeverisjes se Ramës dhe paaftësisë së tij për të menaxhuar situatën”.
