Deputetja e Partisë Demokratike, Jorida Tabaku zhvilloi sot një takim në Bruksel, në Parlamentin Evropian ku së bashku me disa deputetë të tjerë të opozitës kanë marrë pjesë në mbledhjen e Komisionit të Punëve të Jashtme të Parlamentit Evropian (AFET).
Gjatë kësaj mbledhjeje, Tabaku ka pasur edhe një takim me Komisioneren e re për Zgjerimin, Marta Kos. Sipas deputetes së PD, në qendër të diskutimeve ishte rëndësia e përfshirjes së opozitës në procesin e integrimit evropian dhe angazhimi për zgjedhje të lira dhe të ndershme, si një parakusht thelbësor për të çuar përpara jo vetëm procesin e integrimit, por edhe për të forcuar demokracinë në vendin tonë.
“Shqipëria ka potencialin për t’u bërë pjesë e Bashkimit Evropian, por kjo mund të ndodhë vetëm me reforma të ndershme, reale dhe zgjedhje të lira dhe të ndershme. Opozita do të vazhdojë të jetë zëri i përgjegjësisë dhe ndryshimit, për të siguruar që aspiratat e qytetarëve shqiptarë për një të ardhme evropiane të mos mbeten vetëm fjalë”, u shpreh Tabaku në rrjetet sociale.
