Pas mbledhjes së kryesisë së PS, ku u mësua edhe emri i ministrit pasardhës, Saimir Tahiri zhvilloi një tur takimesh me efektivët e policisë së Tiranës.
Tahiri përshëndeti nga afër punonjësit e policisë së Tiranës, ato të qarkullimit rrugor si dhe efektivët e komisariatit nr 2 dhe ata të komisariatit rrugor.
Në bashkëbisedimin me ta, ai i falenderoi për bashkëpunimin dhe rezultatet e arritura.
Por Top Channel raporton se fjalimin e “lamtumirës “, Saimir Tahiri do ta mbajë nesër.
Një nga urdhrat e fundit që ai ka firmosur si ministër i Brendshëm është edhe zhvillimi i panairit të policisë në bulevardin ” Dëshmorët e Kombit ” gjatë festimeve për ditën e Verës, një iniciativë kjo që u mor edhe vjet në kryeqytet por edhe në qytetet turistike të vendit gjatë sezonit veror.
Ministri i Brendshëm Saimir Tahiri po lë detyrën pas më shumë se 3 vite e gjysëm, një periudhë kjo më shumë se çdo ministër tjetër në krye të këtij institucioni pas viteve ‘90.
Gjatë mbledhjes së sotme me koordinatorët e PS për fushatën zgjedhore, iu është komunikuar shkarkimi dhe 3 ministrave të tjerë, përveç Tahirit, përkatësisht Blendi Klosit, Ilir Beqajt si dhe Bledi Çuçit.
Në vend të Saimir Tahirit vjen kryetari i Komisionit të Ligjeve, Fatmir Xhafaj. Ilir Beqaj zëvëndësohet nga ish-drejtoresha e QSUT, Ogerta Manastirliu, te Ministria e Shëndetësisë. Në vend të Blendi Klosit te Ministria e Mirëqenies Sociale shkon deputja e Partisë Socialiste, Olta Xhaçka, ndërsa deputeti tjetër Eduard Shalsi zëvëndëson Blendi Çuçin te Çështjet Vendore.
Largimin e ministrave që drejtojnë 5 qarqe, kryeministri Edi Rama një ditë më parë e justifikoi me domosdoshmërinë që udhëheqësit e fushatës së qershorit, siç tha ai, të furnizohen me energji të reja.
Tahiri, të cilin Rama e quajti një ministër kampion, drejton Tiranën, ndërsa Klosi, Beqaj dhe Çuçi janë në krye për Beratin, Kukësin, Dibrën dhe Gjirokastrën, që nxjerrin gjithsej 21 deputetë.
(M.D/ Shuplaka)
