Ministri i Brendshëm, Saimir Tahiri, i cili është i pranishëm në drekën që Rama shtroi për mësuesit e Kamzës, ka reaguar ndaj akuzave të Partisë Demokratike.
Ai ka postuar rreth një orë më parë, ku shihet se si arsimtarët e Kamzës janë mbledhur për të drekuar dhe festuar në kuadër të festave të fundvitit në drekën e shtruar për ta nga qeveria.
“Live me mësueset dhe mësuesit e Kamzës. Gëzuar festat. Sigurisht, sipas SHQUP-it, jo vetëm janë mbledhur me zor, por edhe po kërcejnë me zor… hahahah”, shkruan Tahiri bashkangjitur videos.
Ky reagim i tij vjen pas akuzave të bëra nga kreu i Departamentit të Arsimit në PD, Luçiano Boçi.
“”Skandaloze ajo që ndodhi dje me mësuesit e Tiranës e po ndodh edhe sot me ato të Kamzës! Në vend që Rama t’i japë mësuesve shpërblimin e fundvitit, siç i takon dhe e kërkon kodi i punës e kontrata kolektive, u imponon atyre një lëmoshë-drekë me Ministrin e Brendshëm, sipas kodeve partiake.”, u shpreh Boçi.
Ai akuzoi ministrin e Brendshëm se “nuk heziton të pozojë para të gjithë mësuesve, me njerëz të arrestuar vetëm para një viti, sipas kodeve të mafias. Të arrestuar, pikërisht për krim ndaj vetë policisë së shtetit e tani të emëruar nga Rama mësues, siç është rasti i fotos me Ermal Myrton.” (XH.A/SHUPLAKA)
